هلمند کې د طالبانو امنیه قومانداني ویلي، د دغه ولایت په واشېر ولسوالۍ کې د یوې ترافیکې پېښې له امله د ښځو او ماشومانو په ګډون د یوې کورنۍ شپږو غړو ژوند له لاسه ورکړی او یو تن ټپي شوی دی.
رخشانه: په هلمند کې د طالبانو د امنیه قوماندانۍ له لوري خپره شوې خبرپاڼه کې راغلي، دغه پېښه تېره ورځ (جمعه د زمري ۱۷ مه) مازیګر مهال د هرات- کندهار پر لویه لار د دې ولایت د واشېر ولسوالۍ د سنګ ګیلان په سیمه کې رامنځ ته شوې ده.
د خبرپاڼې له مخې، دغه پېښه د سپرلۍ موټر او یوه ټېلر موټر د ټکر له امله رامنځ ته شوې ده.
د یادې ترافیکې پېښې په پایله کې د څلورو ماشومانو، یوې ښخې او یوه سړي په ګډون د یوې کورنۍ شپږ غړي وژل شوي او یو تن سربېرن ټپي شوی دی.
خبرپانې د دغه پېښې د قربانیانو د هویت او عمر او دغه راز د ټپي د روغتیايي حالت په اړه څه نه دي ویلي.
په هلمند کې د طالبانو امنیه قوماندانۍ ویلي، چې د دغه پېښې په تړاو یې موټر چلوونکی نیولی دی.
تر اوسه د دغه ترافیکي پېښې د رامنځ ته کېدو دلیل نه دی روښانه شوی.
په هېواد کې هر کال د ښځو او ماشومانو په ګډون لسګونه کسان په ترافیکي پېښو کې قرباني کېږي.
د دغه پېښو ډېری یې د سړکونو د خرابوالي او کم سورۍ، د ترافیکي قوانینو نه مراعت کولو، له حده زیات ګړندي تګ او موټرو د زړښت له امله رامنځ ته کېږي.
