په افغانستان کې د ملګرو ملتونو سیاسي استازولۍ (یوناما) په یوه راپور کې لیکلي، د طالبانو د امربالمعروف ځواکونو له ښځو سره د نارینه محرم پر شتوالي څار زیات کړی دی.
رخشانه: د یوناما د بشري حقونو څانګې په خپل راپور کې، چې نن (یکشبنې د زمري ۱۹ مه) یې خپور کړی ویلي، طالبانو بې چادري ښځې بازار ته له ننوتلو او د عمومي ترانسپورټ د ګټې اخیستنې څخه منع کړي دي.
په راپور کې راغلي، طالبانو د هېواد په یو شمېر سیمو کې د ښځو پر جامو څار زیات کړی دی.
په راپور کې راوړل شوي، د طالبانو د امربالمعروف ځواکونو د روان میلادي کال د مي له اتمې تر ۳۰ مې په هرات کې یو شمېر مېرمنې له دې امله چې چادرۍ یې نه درلودې بازار ته له ننوتلو او دغه راز د عمومي ترانسپورټ د ګټې اخیستې څخه راګرځولې دي.
د ملګرو ملتونو سیاسي استازولۍ په خپل راپور کې لیکلي، یو شمېر ښخې تر هغو چې خپلوانو یې ورته چادرۍ نه وې راوړې، د طالبانو په بند کې وې.
د یاد بنسټ په راپور کې راغلي، د روان میلادي کال جون میاشت کې د ارزګان ولایت په مرکز ترینکوټ ښار کې یو شمېر مېرمنې، چې د چادرۍ پر ځای یې عادي حجاب اغوستی و، د طالبانو د امربالمعروف ځواکونو له خوا نیول شوې وې.
د یوناما د بشري حقونو څانګې په راپور کې راغلي، د طالبانو د امربالمعروف ځواکونو، کلېنیکونو، هټۍ والو، بازارونو، دولتي ادارو او ټکسي موټرچلوونکو ته سپارښتنه کړې، چې له محرم پرته ښځو ته خدمات وړاندې نه کړي.
یوناما دغه راز ویلي، پارکونو او د تفرېح ځایونو ته د ښځو نه لاس رسی لا هم دوام لري او پلی کېږي او طالبانو د مۍ په ۲۳ مه د غور ولایت لعل او سرجنګل ولسوالۍ کې، کورنۍ له یوې تفریحې سیمې ایستلې وې او هغوی ته یې له ښځو سره تفریحي ځایونو ته د تګ په خاطر ګواښ کړی وو.
دغه بنسټ زیاته کړې، طالبانو د روان میلادي کال د می په ۱۶ مه د هرات ولایت د انجیل ولسوالۍ په «پل پشتون» سیمه کې څو کورنۍ، چې ښخې او نجونې ورسره وې، یوې تفریحي سیمې ته له ورتګ څخه راګرځولې او د نارینه وو ډلو ته یې د تګ اجازه ورکړې وه.
د ملګرو ملتونو سیاسي استازولۍ دغه راز ویلي، د روان میلادي کال په می میاشت په کابل کې د دغه بنسټ څو تنه ښځینه کارکوونکې د نامعلومه وسله والو کسانو له خوا په مرګ ګواښل شوې دي.
طالبانو پر هېواد په څلورکلنه واکمنۍ کې د ښځو او نجونو پر وړاندې د زده کړو محدودیتونو سربېره، هغوی په دولتي ادارو، داخلي او بهرنیو بنسټونو کې له کار کولو هم راګرځولې دي.
