په افغانستان کې د ملګرو ملتونو سیاسي استازولۍ (یوناما) په افغانستان کې د بشري حقونو په اړه راپور کې ویلي، طالبانو ښځې، نجونې، د بشري حقونو فعالان، خبریالان، پخواني امنیتي ځواکونه او د مخکني نظام کارکوونکي خپل هدف ګرځولي دي.
رخشانه: یوناما په دې راپور کې، چې نن (یکشنبې د زمري ۱۹ مه) یې خپور کړی زیاته کړې، طالبانو هغه کسان هم په نښه کړي، چې په کابل کې یې په بهرنیو سفارتونو کې کار کاوه.
په افغانستان کې د بشري حقونو د وضعیت په اړه د راپور چمتو کولو موده، د ۲۰۲۵ میلادي کال د اپریل نه تر جون میاشتې پورې ښودل شوې ده.
یوناما په دې درې میاشتني راپور کې ویلي، طالبانو په عام محضر کې خلکو ته د سزا ورکولو ته دوام ورکړی او په دریو میاشتو کې یې ۲۳۴ تنه (۱۸۵ ښځې، ۴۸ نارینه او یو هلک) د بېلا بېلو تورونو له امله په دورو وهلي دي.
په راپور کې راغلي، ۴۹ تنه چې د بشري حقونو له ګواښونو سره مخ او د طالبانو تر کنټرول لاندې افغانستان ته په ناخوښۍ ستانه کړای شوي وو، د طالبانو له خوا نیول شوي او بد چلند ورسره شوی دی.
د ملګرو ملتونو سیاسي استازولۍ وايي، طالبان د عفوې عمومي فرمان ته پام نه کوي او د مخکني نظام د امنیتي ځواکونو او کارکوونکو څخه یې غچ اخیستنې ته دوام ورکړی دی.
دغه راز یوناما ویلي، د روان میلادي کال د اپریل له اولې د جون تر ۳۰ مې د مخکني پوځ ۷ تنه سرتېري د طالبانو له لوري وژل شوي او د پخواني پوځ د غړو د خپل سرو نیونو اته پېښې او د ربړونې درې پېښې مستندې شوې دي.
د ملګرو ملتونو یاد بنسټ زیاته کړې، د دې راپور چمتو کولو په موده کې د ۱۸ نجونو، ۳۵ هلکانو، ۴ ښځو او ۱۳ نارینه وو په ګډون، ۷۰ تنه په افغانستان کې د چاودېدونکو توکو د چاودنو قرباني شوي دي.
یوناما په کونړ او نورستان ولایتونو کې، د افغانستان او پاکستان پر پوله د طالبانو او پاکستاني ځواکونو نښتو ته په اشارې ویلي، د دغه نښتو په پایله کې درې مېرمنې، دوه ماشومان او دوه نارینه ټپیان شوي دي.
