بادغیس کې د طالبانو سیمه ییز چارواکي وايي، د دې ولایت په مرکز قلعه نو ښار کې یو ماشوم د مردارو اوبو څاه ته لوېدلی او ژوند یې له لاسه ورکړی دی.
رخشانه: د بادغیس د امنیه قوماندانۍ ویاند صدیق الله صدیقي ویلي، دغه پېښه پرون (یکشنبې د زمري ۱۹ مه) مازیګر مهال د دې ولایت د مرکز قلعه نو ښار د لومړۍ ناحیې اړوند د «جر خشک» په سیمه کې رامنځ ته شوې ده.
د بادغیس د امنیه قوماندانۍ ویاند د دې ماشوم د هویت او عمر په اړه څه نه دي ویلي.
بادغیس کې یوې سیمه ییزې سرچینې د دې پېښې په پخلي سره رخشانې رسنۍ ته ویلي، دغه ماشوم ۸ کاله عمر درلود او د مردارو اوبو څاه ته تر لوېدو وروسته یې هلته ژوند له لاسه ورکړی دی.
د سرچینې په وینا، پېښه هغه مهال رامنځ ته شوې، چې یاد ماشوم د مردارو اوبو د څاه تر څنګ لوبې کولې او ورلوېدلی دی.
تر دې وړاندې هم د هېواد په یو شمېر ولایتونو کې په ورته پېښو کې د ماشومانو په ګډون څو تنو ژوند له لاسه ورکړی وو.
