په افغانستان کې د طالبانو د واکمنۍ د څلورمې کلیزې په درشل کې د افغانستان د ځواکمنو ښځو او د خپلواکۍ لپاره د افغانستان د متحدو ښځو غورځنګونو په یوه اعلامیه او اعتراضي غونډو کې له افغان مېرمنو د نړیولې ټولنې د ملاتړ غوښتنه وکړه.
رخشانه: د افغانستان د ځواکمنو ښځو اعتراضي غورځنګ نن (دوشنبې د زمري ۲۰ مه) په یوه اعلامیه کې ویلي، [په افغانستان کې د طالبانو له لوري] فشارونه، ګواښونه او ځپنې ورځ تر بلې زیاتېږي.
د افغانستان د ځواکمنو ښځو د غورځنګ اعتراضي غړو په کابل کې یوه غونډه جوړه کړې وه او پر دېوالونو د شعارونو په لیکلو سره یې ټینګار کړی، چې د دوی لپاره دا ورځې د خپلواکیو له لاسه ورکولو، تبعیض د زیاتېدو او ځپنې یادونه دي.
د دوی په اعلامیه کې راغلي:«د اګست پنځلسمه د هېواد د وګړو په ځانګړې توګه د ښځو لپاره د خپلواکیو له لاسه ورکولو، تبعیض د زیاتېدو او ځپنې یادونه کوي.»
اعلامیه کې راوړل شوي:«کلونه کېږي، چې افغان مېرمنې له تاوتریخوالي او درندو محدویتونو سره مخ دي.»
د افغانستان د ځواکمنو ښځو غورځنګ غړو، کابل کې د طالبانو د یوه ملاتړي عالم وینا ته په اشارې ویلي:«ان که یوه سترګه هم د لید لپاره پاتې شي، بیا هم کېدای شي حقیقت پرې ولیدل شي او د هغو غږ پورته کړي.»
هغوی د «ظلم پر وړاندې درېدل» یوه اړتیا او تاریخي مسوولیت وباله او ویلي یې دي«له ملاتړ پرته مقاومت د ښځو ژوند له ګواښ سره مخ کوي.»
معترضو مېرمنو زیاته کړې، ګواښونه، فشارونه او ځپل ورځ تر بلې زیاتېږي او د هغو پر وړاندې چوپتیا، یوازې ظلم او بې عدالتي لا پیاوړې کوي.
هغوی له نړیوالې ټولنې غوښتي، چې افغان مېرمنې یوازې پرېنږدي او له هغوی په ملاتړ د [طالبانو له لوري] د انساني حقونو تر پښو لاندې کېدو مخنوی وکړي.
د ځواکونو ښځو د غورځنګ اعتراضي غړو«د ظلم پر وړاندې د نړۍ چوپيتا» له بې عدالتۍ سره ملتیا وبلله.
د خپلواکۍ لپاره د افغانستان د محتدو ښځو د غورځنګ اعتراضي غړو هم په تخار او پاکستان کې په جلا غونډو کې ویلي، د اګست پنځلسمه د افغانستان د ښځو، د حقونو، خپلواکۍ او هیلو د پاشل کېدو ورځ ده.
هغوی د ۲۰۲۱ میلادي کال د اګست پنځلسمه د «ښځو پر ژوند د تیارو د واکمنۍ پیل» وباله او ویلي یې دي، د طالبانو له ځپلو سره سره به دوی چوپتیا غوره نه کړي.
