په افغانستان کې د ملګرو ملتونو د بشري مېشت ځایونو پروګرام اعلان کړی، چې د افغانستان د وګړو په ځانګړې توګه د ښځو او نجونو لپاره په غیر رسمي مېشت ځایونو کې ورځنی ژوند ستونزمن دی.
رخشانه: یاد بنسټ نن (دوشنبې د زمري ۲۰ مه) په خپله اېکس پاڼه د یوې خبرپاڼې په خپرولو سره لیکلي، افغان مېرمنې او نجونې د خوندیتوب له ګواښونو سره مخ دي.
د ملګرو ملتونو د بشري مېشت ځایونو پروګرام لیکلي:«د افغانستان ښځې او نجونې د لومړنیو خدماتو لکه د اوبو له کمښت او خوندیتوب له ګواښونو سره مخ دي.
په ملګرو ملتونو پورې تړلې دغه بنسټ زیاته کړې، دې موضوع ته رسېدنه باید ونه ځنډول شي.
د سږ کال په پسرلي کې هم د ملګرو ملتونو د بشري مېشت ځایونو پروګرام اعلان کړی و، چې کابل کې ماشومان، د څښاک اوبو، روغتیايي څارنې، زده کړو، شنه او امن چاپېریال ته لاس رسی نه لري.
یاد بنسټ ویلي وو، په کابل کې له هرو ۵ تنو ۴ هغه یې په غیر رسمي مېشت ځایونو کې ژوند کوي.
په دې وروستیو کې ایران، پاکستان او تاجیکستان د افغان کډوالو ایستلو لړۍ ته په پراخه کچه زور ورکړی دی.
له دې هېوادونو د افغان کډوالو د ایستلو په ترڅ کې د ملګرو ملتونو د ماشومانو د ملاتړ صندوق په یوه راپور کې لیکلي، له پاکستان څخه راستنېدونکو کډوالو کې ۲۰ سلنه ماشومان دي.
