په افغانستان کې د ملګرو ملتونو سیاسي استازولۍ (یوناما) د یوه راپور په خپرولو سره وايي، افغانستان کې معلوماتو ته د خلکو لاس رسی، د طالبانو له لوري په پراخه توګه محدود کړای شوی دی.
رخشانه: یوناما په دې راپور کې، چې نن (یکشنبې د زمري ۱۹ مه) یې خپور کړی ویلي، د طالبانو له لوري په خصوصي رسنیو، رسنیزو محدویتونه په بې ساري ډول زیاتوالی موندلی دي.
په راپور کې راغلي، د طالبانو له لوري «رامنځ ته شویو کړنلارو» «مانا لرونکې خبرې اترې څپلې او رسنیزې منځپانګې یې» محدودې کړې دي.
په افغانستان کې د ملګرو ملتونو سیاسي استازولۍ دغه راز ویلي، یو شمېر خصوصي رسنیو یو په درېیمه یا نیم کارکوونکي ایستل او د خپلو فعالیتونو د درېدو وړاندوینه یې کړې ده.
یاد بنسټ د طالبانو د امربالمعروف قانون ۱۷ مادې ته چې په کې پر رسنیو د ساه کښو د انځورونه خپرول منع شوي په اشارې وايي، د دغه قانون پر بسنټ طالبانو د هېواد په نیمايي ولایتونو کې په رسنیو د ساه کښو انځور خپرول منع کړي دي.
په راپور کې راغلي، طالبانو د رسنیو د سیاسي خپرونو د څېړلو لپاره یوه ځانګړې کمېټه رامنځ ته کړې.
دغه راز طالبان ویلي، رسنیو ته بلل شوي کارپوهان باید د دې ډلې له خوا پېژند کارت تر لاسه کړي او د دوی تایید ولري.
یوناما په خپل درې میاشتي راپور کې راوړي، د طالبانو تر واک لاندې افغانستان کې د بیان آزادي هم محدوده شوې او دغه ډلې پر ټولینزو شبکو او مشاعرو په غونډو څار زیات کړی دی.
د راپور پر بنسټ د روان میلادي کال په می میاشت په بغلان، بلخ، کندوز او زابل ولایتونو کې پنځه تنه پر«ټیک ټاک د ناسمو منځپانو لرونکو» ویډیو ګانو خپرولو له امله د طالبانو د امربالمعروف ځواکونو له خوا نیول شوي دي.
یوناما په خپل راپور کې راوړي، د طالبانو مشر د روان میلادي کال د جون په ۱۹ مه«د مشاعرو د غونډو د برابري» قانون له اسلامي کلتور سره د دغه غونډو د سمون په موخه منظور کړ.
یاد بنسټ د راپور په وروستۍ برخه کې اشاره کړې، چې د روان میلادي کال د مارچ میاشتې تر پایه په ټول افغانستان کې ۳۴۳ مدافع وکیلانو شتون درلود، خو طالبانو ښځینه مدافع وکیلانو ته [په حقوقي چارو کې] د فعالیت د تمدید اجازه نه ده ورکړې.
طالبانو په تېرو څلورو کلونو کې د رسنیو او رسنیزو فعالیتونو په وړاندې د محدودیتونو په لګولو سره لسګونه خبریالان او رسنیز فعالان نیولي او لسګونه رسنۍ تړل شوې دي.
