د امریکا د بهرنیو چارو وزارت د طالبانو تر واک لاندې افغانستان کې د بشري حقونو د وضعیت په اړه په خپل راپور کې ویلي، د دغې ډلې فرمانونو، زده کړو، کار او خپلواکۍ ته د ښځو او نجونو لاس رسی محدود کړی او هغوی یې عملآ له عامه ځایونو لرې کړې دي.
رخشانه: د امریکا د بهرنیو چارو وزارت په راپور کې، چې په ۲۰۲۴ کال کې یې په افغانستان کې د بشري حقونو وضعیت څېړلی راغلي، طالبانو د دې هېواد د وګړو په شخصي ژوند شدید محدودیتونه پلي کړي دي.
دا راپور د ملګرو ملتونو، د افغانستان لپاره د دې بنسټ د ځانګړي راپور ورکوونکي او رسنیو د راپورونو په استناد چمتو شوی دی.
په راپور کې د طالبانو له لوري د افغان ښځو او نجونو د حقونو او اساسي خپلواکیو پر وړاندې پراخو محدودیتونو ته په اشارې راغلي، دغو محدودیتونو د ښځو حقونو ته د درناوي کچه د پام وړ راټیټه کړې ده.
د امریکا د بهرنیو چارو وزارت، د ملګرو ملتونو د بشري حقونو ځانګړي راپور ورکوونکي ریچارډ بنټ د راپور پر اساس لیکلي، د طالبانو له لوري د ښځو او نجونو د ځپنې سیستم یو پراخ او سیستماتیک سیستم دی او ښايي د بشریت پر وړاندې جنایت وشمېرل شي.
راپور د نړیوالې محکمې له خوا د «بشریت ضد جرمونو» تر سره کولو په تور د طالبانو د مشر ملا هبت الله اخوندزاده او د دې ډلې د سترې محکمې د رییس عبدالحکیم حقاني د نیولو حکم ته په اشارې لیکلي، یاد محکمه د منل کېدو وړ دلایل لري، چې اخوندزاده او حقاني د روم د اساسنامې د اوومې مادې له مخې د جنسیت پر بنسټ د ځورونې او ربړونې په بڼه د انسانیت ضد جرمونه تر سره کولو امر یا هڅونه کړې او په همدې دلیل د دواړو د نیولو حکم ورکړل شوی دی.
د امریکا د بهرنیو چارو وزارت په خپل راپور کې زیاته کړې، د طالبانو د امربالمعروف قانون خپرېدا د افغانستان د ټولو وګړو پر شخصي ژوند په ځانګړې توګه د ښځو او نجونو په ژوند سخت محدودیتونه لګولي دي.
دغه وزارت ویلي، د قانون حاکمیت ته نه پاملرنه او د بشري حقونو څخه د سرغړونکو مسوولینو لپاره د مجازاتو څخه رسمي خوندیتوب شتون لري.
د امریکا د بهرنیو چارو وزارت خپل سرې وژنې، ورکېدنې، ربړونې یا ظالمانه شکنجې، غیر انساني یا له سپکاوي ډک چلند، په وسله والو جګړو کې د طالبانو له لوري د ماشومانو غیرقانوني ګمارل یا ترې ګټه اخیستل، د طالبانو تر واک لاندې افغانستان کې د بشري حقونو د سرغړاوي پېښې وبللې.
یاد وزارت دغه راز د بیان د آزادۍ او رسنیو پر وړاندې جدي محدودیتونه، خبریالانو سره تاوتریخوالی او ګواښونه، سانسور، د مذهبي آزادۍ محدودول، انساني قاچاق او اجباري کار په افغانستان کې د بشري حقونو د سرغړاوي نورې قضیې وبللې.
