د امریکا د بهرنیو چارو وزارت د طالبانو تر واک لاندې افغانستان کې د بشري حقونو د وضعیت په اړه راپور کې وايي، طالبانو د فرمانونو په صادرولو سره په افغانستان کې د بیان او رسنیو آزادي سخته محدوده کړې ده.
رخشانه: د امریکا د بهرنیو چارو وزارت په راپور کې، چې په ۲۰۲۴ کال کې یې په افغانستان کې د بشري حقونو وضعیت څېړلی راغلي، طالبان د بیان آزادۍ حق ته درناوی نه لري.
په دې راپور کې چې د ملګرو ملتونو، د افغانستان لپاره د دې بنسټ د ځانګړي راپور ورکوونکي او رسنیو د راپورونو په استناد چمتو شوی راغلي، دغې ډلې په وار وار خبریالان، رسنیز کارکوونکي او رسنیز فعالان نیولي او زنداني کړي دي.
د افغانستان د خبریالانو مرکز د شمېرو پر اساس په افغانستان کې لږ تر لږه ۱۱ خبریالان او د رسنیو کارکوونکي په بند کې دي او یا هم د خپل بند سزا تېروي.
د امریکا د بهرنیو چارو وزارت په خپل راپور کې ویلي، د رسنیو پر وړاندې د محدودیتونو لګول د څو رسنیو د بندېدو لامل شوي دي.
دغه وزارت زیاته کړې، طالبانو د معترضینو او خبریالانو پر وړاندې له زوره کار اخیستی، سیاسي بحثونه او مخالفتونه یې ځپلي او د طالبانو دغه کړنو پر مدني ټولنه سخت منفي اغېز کړی دی.
د امریکا د بهرنیو چارو وزارت په خپل راپور کې دا هم ویلي، چې پر طالبانو عمومي نیوکه که د کس له خوا وي یا دې ډلې تر زیاته بریده چوپه کړای شوي او عمومي ویناوې د دغه ډلې تر پراخ څار لاندې تر سره کېږي.
یاد وزارت د یوناما په حواله ویلي، طالبانو په قصدي توګه انټرنېټ ته لاس رسی محدود کړی او په هغه سیمو کې چې د دې ډلې مخالفین فعل دي، انټرنټ یې پرې کړی او یا یې هم سرعت خورا کم کړی دی
