د کاناډا د بهرنیو چارو وزارت پر افغانستان د طالبانو د واکمنۍ د څلورمې کلیزې په درشل کې اعلان کړی، چې بشري حقونو ته له غاړې اېښودو پرته به، د طالبانو له نظام سره هېڅ ډول اړیکه عادي نه کړای شی.
رخشانه: دغه وزارت نن (جمعه د زمري ۲۴ مه) په یوه اعلامیه کې ویلي، د طالبانو تر واک لاندې افغانستان کې روانه ځپنه، د بشري حقونو څخه سیستماتیک سرغړاوي او د بنسټیزو خپلواکیو له منځه وړل په کلکه غندي.
په اعلامیه کې راغلي، واک ته د طالبانو له رسېدو څلور کاله وروسته هم افغانستان په یوه ژور ناورین کې راګیر دی.
یاد وزارت لیکلي:«د حقونو بېرته راګرځول په ځانګړې توګه د ښځو او نجونو لپاره ناورین دی، په میلیونونو نجونې له زده کړو بې برخې دي، د ښځو لپاره کاري فرصتونه، د بیان آزادي، له وېرې پرته د وقار ژوند له منځه تللی دی.»
د کاناډا د بهرنیو چارو وزارت ویلي، د مدني ټولنو چاپېریال، هر ډول دیموکراتیک بیان او یا پراخ سیاسي ګډون له منځه وړل شوي دي او طالبان د یوه پراخ بنسټه حکومت د جوړېدو لپاره هېڅ ډول نښه نه ده ښودلې.
په اعلامیه کې راغلي، ترهګرې ډلې په افغانستان کې فعالې دي او دا د سیمې او نړۍ د امنیت لپاره یو جدي ګواښ ګنل کېږي.
د کاناډا د بهرنیو چارو وزارت لیکلي:«طالبان باید ځواب ویوونکي وي، تر څو د بشري حقونو، پراخ بنسټ حکومت، او بنسټیزو آزادیو د خوندیتوب برخو کې د پام وړ پرمختګ نه وي لیدل شوی، له طالبانو سره به هېڅ ډول اړیکه عادي نه کړای شي.»
په اعلامیه کې راغلي، کاناډا د افغانستان له خلکو سره په خپل پيستون ټينګار کوي او دغه راز د یوې سوله ییزې، پراخ بنسټې او خوندي راتلونکې لپاره چې د افغانستان خلک وکولی شي په کې له وېرې او ځپنې پرته ژوند وکړي ژمنه ده.
دغه راز کاناډا په افغانستان کې د بشري حقونو د بشپړې بیارغونې او درناوي او د سیاسي راتلونکې په جوړولو کې د افغانانو د ریښتیني ګډون غوښتنه هم کړې ده.
