د ملګرو ملتونو کارپوهانو د طالبانو حکومت له تاوتریخوالي او ظلمه ډک بللی او له نړیوالې ټولنې یې غوښتي، چې له دغه نظام سره د هر ډول اړیکو له عادي کولو ډډه او پر وړاندې یې مقاومت وکړي.
رخشانه: د ملګرو ملتونو کارپوهانو تېره ورځ( پنشنبې د زمري ۲۳ مه) په یوه ګډه اعلامیه کې ویلي، څلور کاله کېږي چې د افغانستان خلک په ځانګړې توګه ښځې او نجونې د خپلو حقونو او اساسي خپلواکیو پر وړاندې د یوې نه درېدونکې او زیاتېدونکې څپې سره مخ دي.
په اعلامیه کې راغلي، طالبان له مشروعیت پرته عمل کوي، د جنسیتي ظلم یو بنسټیز سیستم یې پلی کړي، هر ډول مخالفت ځپي، غچ اخلي، خپلواکې رسنۍ بندوي او په ښکاره توګه په بشري حقونو، برابرۍ او نه تبعیض باندې ملنډې وهي.
دغو کارپوهانو ټينګار کړی، چې تېر کال کې طالبانو خپل تش په نوم قوانینو، فرمانونو او احکامو پلي کولو ته دوام ورکړی او د ښځو او نجونو د زده کړو، خپلواکۍ، تګ راتګ، کار، روغتیا، بیان آزادۍ او په کلتوري ژوند کې د ګډون پر حقونو یې سخت محدودیتونه ټينګ ساتلي دي.
په اعلامیه کې راغلي:«د طالبانو له جنستي توپيراو ظلم څخه ډک سیستم دومره سخت دی، چې د بشریت پر وړاندې د جنسیت پر بنسټ پر ځورونې او ربړونې پای مومي.»
هغوی د جرمونو پر ضد د نړیوالې محکمې له لوري د طالبانو د دوه لوړ پوړو چارواکو د نیولو د حکم له صادرولو هرکلی کړی ویلي یې دي:«موږ له ټولو هغو هڅو چې طالبان ځواب ویوونکي کوي ملاتړ کوو.»
دغو کارپوهانو همدارنګه د بشري حقونو په پراخ سرغړاوي، له هغې جملې، د علني اعدامو زیاتوالی، بدني سزاوې، نیونې، خپل سري زنداني کول، له قضا پرته اعدامونه، د قومي او مذهبي لږکیو په نښه کولو باندې هم اندېښنه څرګنده کړې ده.
د ملګرو ملتونو کارپوهانو ویلي:«په افغانستان کې وضعیت خراب دی، خو دا نه باید یو تمام شوی او د نه بدلون وړ کار وبلل شي، بله راتلونکې هم امکان لري.»
کارپوهانو ټينګار کړی، چې د طالبانو د پراخ ځپنې سره مقابله یوې «هر اړخیزه» کړنلارې ته اړتیا لري او دغه کړنلار باید د فشار، اصولي نړیوال ملاتر او نړیوال حساب ورکونې ټولګه وي، له هغې ډلې یوه داسې هر اړخیزه او ځواکمنه پلټونکې کړنلاره، چې بشپړ واکونه ولري.
کارپوهانو وايي، جنسیتي توپیر باید جرم وګڼل شي او له مدني ټولنې په ځانګړې توګه له هغو بنسټونو چې ښځې یې اداره کوي ملاتړ وشي. په دې اقداماتو کې د جنستي توپير جرم کول، د مدني ټولنې- په ځانګړې توګه د ښخو بنسټونو لپاره د ملاتړ پیاوړتیا او د بودجې زیاتوالی شامل دی.
کارپوهانو ویلي:«موږ ټينګ باروي یو، چې په افغانستان کې بدلون تر ټولو ښه پایله هغه مهال لرلی شي، چې د دغه هېواد د خپلو وګړو له خوا یې مشري وشي، خو هغوی نه شي کولی په یوازې ځان دا کار تر سره کړي، په پيستون کې نړیوال اصولي، متمرکز، دوامداره او ریښه لرونکی ملاتړ خورا مهم دی. د هېڅ ډول اقدام نه کولو پرته د طالبانو ځپوونکی موتی ورځ تر بلې پياوړی کېږي. د افغانستان د خلکو تر څنګ درېدل هم اخلاقي دنده او هم د بشري حقونو مسوولیت دی، دا کار نه یوې د افغانستان د خلکو، بلکې د نړیوالې ټولنې په ګټه هم دی.
