پر افغانستان د طالبانو واکمنۍ د څلورمې کلیزې په درشل کې د بښې نړیوال سازمان اعلان کړی، چې ښځې په عام محضر کې په دورو وهلو وروسته د غیر انساني شرایطو سره مخ کېږي.
رخشانه: د بښنې نړیوال سازمان نن (شنبې د زمري ۲۵ مه) په خپله اېکس پاڼه د یوه پوسټ په خپرولو سره لیکلي، د طالبانو تر واک لاندې افغانستان کې بدني سزاوې «له وړ قضايي چلند» پرته تر سره کېږي.
یاد بنسټ زیاته کړې، تورنو کسانو ته د« قانوني کړنلارو او قربانیانو او د هغوی کورنیو ته د مرستې چمتو کولو» په نه شتون کې سزا ورکول کېږي.
د بښنې نړیوال سازمان ټینګار کړي، چې کورنۍ او ښځې په عام محضر کې له وېرونکو دورو وهلو وروسته په ټولنو کې له غیر انساني شرایطو او ناسم چلند سره مخ کېږي.
یاد بنسټ له طالبانو غوښتي، چې سملاسي دې د افرادو بدني سزاوې ودروي او نړیوالو قوانینو ته د درناوی وکړي.
سره له دې چې په عام محضر کې بدنې سزاوې او په دورو وهل منع دي، خو طالبان هره ورځ د هېواد وګړي په ځانګړې توګه ښځې په بېلابېلو تورونو په عام محضر کې په دورو وهي.
دغې ډلې په تېرو څلورو کلونو کې لږ تر لږه ۱۰ تنه په څو ولایتونو کې د بېلابېلو تورونو له امله اعدام کړي او سلګونه نور یې په دورو وهلي دي.
