د طالبانو پر وړاندې د مقاومت یوې جبهې پر افغانستان د دغه ډلې د واکمنۍ په څلورمه کلیزه کې اعلان کړی، چې طالبانو په دې څلورو کلونو کې د مخکني نظام د پوځ ۳۰ ښځینه غړې وژلې دی.
رخشانه: دغې جبهې نن (شنبې د زمري ۲۵ مه) پر خپله اېکس پاڼه د یوې خبرپاڼې په خپرولو سره ویلي، د طالبانو تر واک لاندې افغانستان د نړیوالو ترهګرو په مرکز بدل شوی او د خپل تاریخ تر ټولو سخت دوران تېروي.
د ازادۍ جبهې په اعلامیه کې راغلي:«له کار او زده کړو او په ټولنه کې د ښځو او نجونو محرومیت ورځې تر بلې پراخ او ژور شوی، چې د جنسیتي توکمپالونکي نظام روښانه بېلګې وړاندې کوي، سیستماتیک تبعیض او قومي، ژبني، او مذهبي پاکوالي د خلکو د ژوند ټولې برخې نیولي دي.
یادې جبهې زیاته کړې، یوازې تېر کال د پخواني نظام د پوځ ۲۰۹ غړي د هېواد په ۳۰ ولایتونو کې د طالبانو له خوا وژل او ترور شوي او ۱۴۵ نور د دغه ډلې له خوا نیول شوي، زنداني شوي او شکنجه شوي دي.
د آزادۍ جبهه وايي، ځواکونو یې په کابل، کندوز، تخار، بغلان، بلخ، کاپيسا، هرات، فاریاب، پروان، پنجشېر، سرپل، لغمان او بادغیس ولایتونو کې د طالبانو پر مرکزونو، خځو، چک پاینټونو او راټولېدو پر ځایونو ۸۸ بریدونه تر سره کړي، چې په ترڅ کې یې ۲۲۵ طالبان وژل شوي او ۱۷۴ نور ټپيان شوي دي.
د آزادۍ جبهې په خبرپانه کې راغلي، د طالبانو د امربالمعروف ځواکونود «افغانستان د خلکو، د ښځو پر عزت او عفت او د نارینه وو په حیثیت او وقار» باندې تېری کړی او د دغې ډلې مرکزونه، قرارګاوې، بندخونې او زندانونه د افغانستان د مبارزو، پوهو او زړه ورو ښځو او نجونو په تېریو، ربړونې او تجاوز لړلي دي.
د آزادۍ جبهې د طالبانو له لوري پر رسنیو محدودیتونو ته په اشارې ویلي«د بیان آزادي، د رسنیو آزاد فعالیت او معلوماتو ته د افغان وګړو د لاس رسي حق په یوه افسانه او د افغانستان د ښځونو او پوهنتونو تعلیمي نصاب د دغه ډلې له خوا د مغز منځلو او ترهګرۍ د سرتېرو» په مرکز بدل شوی دی.
دغه جبهې ویلي، له شپږم ټولګي پورته د نجونو پر مخ د ښوونځیو له تړل کېدو سره د طالبانۍ، افراطیت او ترهګرۍ مدرسې زیاتې شوې، افراطیت تر کورنیو پورې پراختیا موندلې او د ناوړه ګټې اخیستنې، اجباري او کم عمره ودونو او نورو ټولنیزو زیانونو لپاره یې زمینه برابره کړې ده.
د افغانستان د آزادۍ جبهې ویلي«د ښځو د هڅو، غوښتنو، اعتراضونو او قربانیو ته په درناوي سره.» دوی د طالبانو د نظام د نسکورولو لپاره کار کوي.
