نورستان کې د طالبانو د اطلاعاتو او کلتور ریاست اعلان کړی، چې د دغه ولایت په ګامدېش ولسوالۍ کې د سېلابونو راوتلو له امله، د ښځو او ماشومانو په ګډون پنځو تنو ژوند له لاسه ورکړی دی.
رخشانه: نورستان کې د طالبانو د اطلاعاتو او کلتور ریاست په خبرپاڼه کې راغلي، دا پېښه د پنشنبې په شپه(د زمري ۲۳ مه) د دې ولایت د کامدېش ولسوالس په «پتیګل» کلي کې رامنځ ته شوې ده.
خبرپانه کې راوړل شوي، په پتیګل کلي کې د سېلابونو راوتلو له امله درې ماشومانو، یوې ښځې او یوه سړي ژوند له لاسه ورکړی دی.
د دغې پېښې د قربانیانو هویت او عمر نه دی معلوم شوی او دا هم نه ده معلومه چې ټول د یوې کورنۍ غړي وو که څنګه.
دغه راز د سېلابونو راوتلو له امله لسګونه جرېبه کرنیزه ځمکه، د استوګنې کورونه او د اوبو لګولو کانالونه هم ویجاړ شوي دي.
د روان لمریز کال په جریان کې د هېواد په یو شمېر ولایتونو کې د سېلابونو راوتلو له امله د مالي زیانونو تر څنګ د ښځو او ماشومانو په ګډون له څو تنو هم قرباني اخیستې ده.
