روان کال له ایران او پاکستان څخه د افغان کډوالو د ایستلو لړۍ په ترڅ کې د افغانستان لپاره د ملګرو ملتونو (یوناما) د عمومي منشي ځانګړې استازې رزا اوتنبایوا وايي، ښځې او ماشومان له لا زیات ګواښ سره مخ دي.
رخشانه: د ملګرو ملتونو استازولۍ (یوناما) پورې تړلې پاڼې نن (دوشنبې د زمري ۲۷ مه) پر خپله فسبوک پاڼه د یوه پوسټ په خپرولو سره خبرداری ورکړی، چې په ۲۰۲۵ کال کې له یو میلیون زیاتو افغان کډوالو ایستلو، ملاتړي بنسټونه تر سخت فشار لاندې راوستي دي.
یوناما لیکلي، ښځې او ماشومان له زیات ګواښ سره مخ دي او له ناورین او نورو کړاونو د مخنیوي لپاره د نړیوالې ټولنې پراخو بېړنیو مرستو ته اړتیا ده.
یاد بنسټ زیاته کړې، اوتنبایوا له ایران څخه د ایستل شویو کډوالو د وضعیت د ارزولو لپاره د هرات اسلام کلا له پولې ته چېرته چې هره ورځ سلګونه ګډوالې کورنۍ هېواد ته راځي لیدنه کړې ده.
هغې د ایران څخه د راستنو شویو افغان کډوالو د وضعیت له ارزولو وروسته ویلي، د هغوی ستنول له ستړیا، رواني ستونزو او نامعلومې راتلونکې سره مل دي.
د ملګرو ملتونو دې چارواکې د نړیوالې ټولنې په بېړني ملاتړ ټینګار کړی ویلي یې دي، په روان کال کې د ۱.۳ میلیونه کډوالو ایستلو په داسې حال کې، چې ۷۰ سلنه وګړي له بېوزلۍ سره مخ دي، د هېواد پر مات او محدود کړای شوې وړتیا لا زیات فشار راوستی دی.
نوموړې خبرداری ورکړی، چې ملاتړي بنسټونه او طالبان دې سترګې نه پټوي ځکه چې« نه اقدام کول به د خلکو د ژوند له لاسه ورکولو پر بیه پرېوځي.»
څو ورځې وړاندې د ملګرو ملتونو د کډوالو چارو عالي کمېشنرۍ هم اعلان کړی وو، چې دوی افغانستان ته د راستنېدونکو کډوالو سره د بېړنیو مرستو د وړاندې کولو په حال کې دي، خو بودجه یې د ختمېدو په حال کې ده.
ایران او پاکستان د افغان کډوالو ایستلو لړۍ ته زور ورکړی دی. ایران په تېرو وروستیو څو میاشتو کې له یو میلیون او ۱۰۰ زره څخه زیات بې اسنادو افغان کډوال ایستلي دي.
