د طالبانو له لوري د بامیان ولایت د پنجاب ولسوالۍ له «رشک» کلي څخه د کابو ۲۵ کورنیو په زور شړلو په ترڅ کې د ملګرو ملتونو د بشري حقونو شورا ځانګړی راپور ورکوونکی ریچارډ بنټ وايي، بې ځایه کول هېڅ وخت د منلو نه دي.
رخشانه: بنټ نن(سه شنبې د زمري ۲۸ مه) په خپله اېکس پاڼه د یوه پوسټ په خپرولو سره لیکلي، دا مهال دوی د بامیان ولایت د پنجاب ولسوالۍ د رشک د کلي د اوسېدونکو د اجباري ایستلو د ارزولو په حال کې دی.
د ملګرو ملتونو د بشري حقونو شورا ځانګړي راپور ورکوونکي په دې برخه کې، د یوې سوله ییزې او عادلانه حل لارې د برابرېدو غوښتنه کړې ده.
هغه ویلي، طالبان باید نړیوالو نورمونو له هغې ډلې عادلانه محکمې، د معلوماتو دورې، اصلې مشورې او د زیان جبران معیارونو ته ژمن پاتې شي.
بامیانو کې سیمه ییزه سرچینو د (زمري ۶ مه) د دوشنبې ورځ رخشانې رسنۍ ته ویلي وو، طالبانو د دې ولایت د والي په امر د بامیانو د پنجاب ولسوالۍ د «رشک پشته غرغری» کلي ۲۵ کورونه مهر و لاک کړي او اوسېدونکي یې ترې په زور ایستلي دي.
د سرچینې په وینا، طالب پلاوي د «سترې محکمې دوه پرېکړه لیکونه» له پامه غورځولي، ۲۵ کورونه یې مهر و لاک کړي، ښځې، ماشومان او د کورونو توکي یې په زور له کورونو بهیر ایستلي دي.
سرچینې زیاته کړې، بامیانو کې د طالبانو والي د دې ډلې د سترې محکمې هغه پرېکړه، چې دغه ځمکې د رشک کلي د ځایي اوسېدونکي دي، نه مني او وايي، د دغه کلي اوسېدونکي باید خپلې ځمکې کوچیانو ته پرېږدي.
په ورته وخت کې ځینې رسنیو د سیمه ییزه سرچینو په حواله لیکلي، طالب ځواکونو د پنجاب ولسوالۍ د رشک کلي یوه ځوانه نجلۍ نیولې وه، تر څو د دې کلي نارینه د دغه ډلې پرېکړه ومني او کلی خالي کړي.
