د بشري حقونو فعالې او د نوبل جایزې ځوانې ګټوونکې ملالې یوسفزی د افغانستان د نجونو د زده کړو لپاره ۳.۲۶ میلیون ډالره ځانګړي کړي دي.
رخشانه: آغلې یوسفزی تېره ورځ (چهارشنبې د زمري ۲۹ مه) ناوخته په خپله اېکس پاڼه د یوه پوسټ په کولو سره لیکلي، دا پیسې یې د نجونو د زده کړو د دوام او د هغوی د حقونو د دفاع په پار ځانګړې کړې دي.
هغې لیکلي:«څلور کاله کېږي، افغان ښځو او نجونو د جنسیتي توپیر د پای ته رسولو لپاره د زده کړو د ټولګیو، محکمو او ایتلافونو له لارې یو ژغورونکی غورځنګ رهبري کوي.»
آغلې یوسفزی ټینګار کړی، چې نوې او پراخه شوې بودجه به د نجونو لپاره د بدیل زده کړو چمتولو کولو او جنسیتي توپیر له منځه وړلو لپاره مالي ملاتړ وکړي.
په افغانستان کې د ملالې صندوق د نوښت لوړ پوړې مدیرې سحر حلیمزی ویلي، دغه بنسټ له هغو نجونو ملاتړی دی، چې د جنستي توپیر پر ضد مبارزه کوي.
په هغه اعلامیه کې چې د ملالې بنسټ له خوا خپره شوې راغلي،:«د صندوق نوي ګډونوال اوس په افغانستان کې له لسو زرو زیاتو نجونو ته مخامخ او انلاین زده کړو ته د لاس رسي زمینه برابروي.»
په اعلامیه کې راوړل شوي:« د افغانستان لپاره د زده کړو پل» د انلاین ټولګیو له لارې له شپږم ټولګي پورته ۱۰ زره نجونو لپاره زده کړو ته بشپړ لاس رسی برابروي.»
په دې برنامه کې نجونې د ښوونځي د کتابونو سربېره، د ډېجیټال سوداي زده کړو، رواني- ټولنیز ملاتړ او روزنې مهارتونه هم زده کوي.
یاد بنسټ زیاته کړې، په افغانستان کې د جنسیتي توپیر په رسمیت پېژنده نه یوازې د طالبانو د مسوول کولو لپاره خورا مهمه ده، بلکې دا به د هېوادونو له لوري د مرستو، دیپلوماتیک تعامل او د کډوالو د ساتنې پر څرنګوالي هم اغېز وکړي.
د دغه بنسټ په وینا، دا خبر د ملالې صندوق د نوې پنځه کلنې ستراتېژۍ د پیل وروسته راځي، چې موخه یې د نجونو د زده کړو د حقونو او سرچینو د خوندي کولو لپاره په نړیواله کچه د ۵۰ میلیون ډالرو مرستې ځانګړي کول دي.
