په بلخ او بدخشان ولایتونو کې د دوه جلا ترافیکي پېښو له امله د دوه ښځو په ګډون شپږ تنه مړه شوي او د شپږو نارینه وو، دوه ښځو او یوه ماشوم په ګډون نهه تنه نور ټپيان شوي دي.
رخشانه: بدخشان کې سیمه ییزې سرچینې وايي، د دې ولایت په راغستان ولسوالۍ کې له سړک نه د یوه موټر د اوښتو په پایله کې، د دوه ښځو په ګډون درې تنو ژوند له لاسه ورکړی او دوه ښځو، دوه نارینه وو او یوه ماشوم په ګډون پنځه تنه نور ټپیان شوي دي.
د سرچینې په وینا، دغه پېښه تېره ورځ (یکشنبې د وږي ۲ مه) د راغستان- فیض آباد پر لویه لار د راغستان ولسوالۍ د «پطیر» په کلي کې رامنځ ته شوې ده.
سرچینې زیاته کړې، د موټر ټوله سورلي د یوې کورنۍ غړي دي او موټر یې له سړک څخه اوښتی دی.
د دغې پېښې ټپیان د درملنې په موخه د بدخشان ولایتي روغتون ته لېږدول شوي دي، خو له روغتیايي وضعیت څخه یې معلومات نشته.
بلخوا بلخ کې د طالبانو امنیه قوماندانۍ هم ویلي، په دې ولایت کې د یوې ترافیکي پېښې له امله درې تنه مړه او څلور نور ټپیان شوي دي.
دغه پېښه د حیرتان – مزارشریف پر لویه لار د سورلۍ د یوه موټر له سړک د اوښتو او چپه کېدو له امله رامنځ ته شوې ده.
بلخ کې د طالبانو امنیه قوماندانۍ ویلي، د دغې پېښې ټپیان د درملنې په موخه ابو علي سینا بلخي روغتون ته لېږدول شوي دي.
په وروستیو څو ورځو کې د هېواد په یو شمېر ولایتونو کې د څو ترافیکي پېښو له امله د ښځو او ماشومانو په ګډون لسګونو کسانو ته مرګ ژوبله اوښتې ده.
ډېری دغه پېښې د سړکونو د خرابوالي او سور د کمښت، له حده زیات ګړندي تګ، ترافیکي قوانینو نه مراعت کولو او موټرو د زړښت له امله رامنځ ته کېږي
