نورستان کې سیمه ییزه سرچینې وايي، د دې ولایت په دوآب ولسوالۍ کې یو سړي د خپلې مېرمنې پلار او مور په ډزو وژلي دي.
رخشانه: نورستان کې دوه سرچینو رخشانې رسنۍ ته ویلي، دغه پېښه تېره ورځ (دوشنبې د وږي ۳ مه) مازیګر مهال د دې ولایت د دوآب ولسوالۍ په «شارودمي» کلي کې رامنځ ته شوې ده.
د سرچینو په وینا، دغه پېښه د کورنیو ستونزو له امله رامنځ ته شوې او دغه سړي د خپلې مېرمنې پلار او مور وژلي دي.
د سرچینو د خبرو پر بنسټ، دغه سړی د خپل خسر او خواښې تر وژلو وروسته له خپلې مېرمنې سره یو ځای تېښته کړې ده.
سرچینو زیاته کړې، د دغه کورنۍ پېښې قربانیان، د مولوي سعد په نوم د یوه دیني عالم پلار او مور دي.
د دغه دوه کسانو د قتل د رامنځ ته کېدو په اړه نور جزیات نه دي ورکړل شوي.
نورستان کې طالب چارواکو هم تر اوسه په دې اړه څه نه دي ویلي.
تېره ورځ هم هرات کې یو سړي خپله، مور، مېرمن او ۱۳ کلنه لور وژلې وې.
