افغانستان کې پر رسنیو د محدویتونو په دوام، طالبانو یو ځل بیا په یوه ژوندۍ خبري ناسته کې د یوې ښځینه خبریالې غږ او انځور پرې کړ.
رخشانه: د دغې ښځینه خبریالې غږ او انځور نن (سه شنبې د وږي ۴ مه) کابل کې د حکومت د رسنیو په مرکز کې د خبري ناستې پر مهال پرې شو.
دا په روان لمریز کال کې درېیم ځل دی، چې طالبان په ژوندیو خبري ناستو کې د ښځینه خبریالانو غږونه پرې کوي.
د طالبانو ویاند ذبیح الله مجاهد نن د حکومت د رسنیو په مرکز کې د دې ډلې د حکومت پنځه کلنه تګلاره اعلان کړه او د طالبانو تر واک لاندې د افغانستان ملي تلوېزیون یاده ناسته په ژوندۍ بڼه خپروله.
مجاهد په دې ناسته کې د دې پوښتنې په ځواب کې، چې د طالبانو برنامه کې د نجونو زده کړه په کومه برخه کې ځای لري، و ویل، دا یوه «کوچینۍ موضوع» ده. هغه په هېواد کې د نجونو د زده کړو په اړه یوې بلې پوښتنې ته هم ځواب ورنه کړ.
د طالبانو د امربالمعروف د قانون پر بنسټ، چې تېر لمریز کال د دې ډلې د امربالمعروف وزارت له خوا توشیح شو، د ښځې غږ «عورت» ګڼل شوی دی.
د روان کال د زمري میاشتې په لومړیو کې هم د دې ډلې د بهرنیو چارو او دفاع وزارتونو او سټنډرډ ادارې په خبري ناستو کې د ښځینه خبریالانو غږ او انځور د طالبانو د رسنیو د چارواکو له خوا پرې شوي وو.
طالبان واک ته له رسېدو وروسته پر رسنیو د محدودیتونو لګولو سره د لسګونه غږیزه، تصویري او چاپي رسنیو د بندېدو او سلګونو خبریالانو او رسنیو د کارکوونکو د بې دندې کېدو لامل شول.
