د افغانستان د ځواکمنو ښځو غورځنګ غړو په یوه اعتراضي غونډه کې طالبانو ته په خطاب کې ویلي، په افغانستان کې جنسیتي توپیر پای ته ورسوۍ.
رخشانه: د دغه اعتراضي غورځنګ غړو نن (چهارشنبې د وږي ۵ مه) په یوه احتجاجي غونډه کې ویلي، د هېواد په پرمختګ او د کلتور په وده کې د ښځو او نجونو د رول څخه انکار نه شي کېدای.
هغوی د طالبانو له لوري د افغانستان د ښځو او نجونو د حقونو او اساسي خپلواکیو پر وړاندې پراخو محدودیتونو ته په اشارې وايي، د طالبانو د ظلم پر وړاندې چوپتیا، د هغوی د منلو په مانا ده.
د افغانستان د ځواکمنو ښځو غورخنګ په اعلامیه کې راغلي«هېڅ ځواک نه شي کولی ښخې او نجونې د تل لپاره څنډې ته کړي یا د هغوی غږ غلی کړي.»
د ځواکمنو ښځو غورځنګ غړو د افغانستان د ښځو او نجونو پر وړاندې د طالبانو له لوري د لګول شویو ټولو محدودیتونو او توپیري چلندو د ژر تر ژره درېدو غوښتنه وکړه.
هغوی د افغان نجونو او ښخو د زده کړو، کار، ټولنیز ګډون او برابرو پرېکړو کولو د حق پر خوندیتوب ټینګار وکړ.
طالبانو په تېرو څلورو کلونو کې د متعرضو مېرمنو، بشري حقونو د بنسټونو او ملګرو ملتونو د غوښتنو پر خلاف، په ښځو باندې لګول شوي محدویتونه نه دي لغوه کړي.
دغه ډله د هرې ورځې په تېرېدو په هېواد کې د ښځو او نجونو پر وړاندې نوي محدودیتونه لګوي.
تازه هرات کې د طالبانو د امربالمعروف ریاست د ژبو د ښوونیزو مرکزونو چارواکو ته ویلي، له دې وروسته، هېڅ زده کوونکې نجلۍ باید په تولګي کې مځ لوڅې ونه لیدل شي.
