هرات کې سیمه ییزه سرچینې وايي، په دغه ولایت کې د طالبانو د امربالمعروف ریاست د ژبو ښوونیزو مرکزونو چارواکو ته ویلي، چې په ټولګیو کې د زده کوونکو نجونو مخونه ښکاره نه شي.
رخشانه: هرات کې د یوه ښوونیز مرکز یوه مسوول د هویت پټ ساتلو سره رخشانې رسنۍ ته ویلي، دغه امر تېره ورځ (سه شنبه د وږي ۴ مه) د طالبانو د امربالمعروف رییس د ښوونیزو مرکزونو له مسوولینو سره به ناسته کې مطرح کړی دی.
د سرچینې په وینا، هرات کې د طالبانو د امربالمعروف رییس په دې ناسته کې ټينګار کړی، چې نجونې باید مناسبې جامې پر تن کړي او «چادر نماز، ماسک او له هېڅ ډول سینګار پرته ښوونیزو مرکزونو ته لاړې شي.»
سرچینې زیاته کړې:«په خواشینۍ سره محدودیتونه خورا سخت او درانه دي، موږ تېره ورځ ژمنه وکړه، چې په ټولګیو کې به د زده کوونکو نجونو مخونه لوڅ نه وي.»
د رخشانې رسنۍ د سرچینې د خبرو پر بنسټ، په ټولګي کې د شتون لپاره د چادرنماز اغوستل الزامي دي او یوازې هغه نجونې په ټولګیو کې د شتون اجازه لري، چې چادرنماز او ماسک ولري.
په ورته وخت هرات کې د یوه ښوونیز مرکز یو شمېر زده کوونکو هم تایید کړه، چې د انګلیسې ژبې د ښوونیز مرکز ښخینه خدمتي کارکوونکې د دوی د جامو څارنه کوي او له «چادرنماز» پرته نجونو ټولګیو ته له ننوتو مخنیوی کوي.
د طالبانو له لوري د دغه محدودیتونو په پلي کولو سره ښوونیز مرکزونه هم د دغه ډلې لارښوونې تعقیب کړې او د حجاب د تبلیغ لپاره یې بېنرونه لګولي دي.
په دغه بېنرونو کې یو چې انځور یې رخشانې رسنۍ ته رسېدلی، یوه ښځه ښيي چې د طالبانو د غوښتنو سره سم حجاب یې کړی او په هغې کې حجاب د ښځې«خوندیتوب» او «غزت» بلل شوی دی.
طالبانو پر هېواد په خپله څلورکلنه واکمنۍ د ښخو او نجونو پر وړاندې د پراخو محدودیتونو په لګولو سره هغوی په ښوونځي کې له زده کړو او پوهنتونونو کې له تحصیل څخه منع کړې دي.
