د طالبانو د کورنیو چارو وزارت ویاند عبدالمتین قانع وايي، د کابل پغمان ولسوالۍ د ارغندۍ په سیمه کې د یوه مسافر وړونکي بس موتر د چپه کېدو په پېښه کې ۲۵ تنو ژوند له لاسه ورکړی او ۲۷ نور ټپيان شوي دي.
رخشانه: د طالبانو د کورنیو چارو وزارت ویاند ویلي، دغه پېښه نن سهار(چهارشنبې د وږي ۵ مه) د کابل- کندهار پر لویه لار رامنځ ته شوې ده.
د قانع په وینا، یو ۵۸۰ مسافر وړونکی بس موټر چې له هرات نه د کابل پر لور روان وو، د ارغندۍ په سیمه کې له سړک نه اوښتی او وروسته چپه شوی، چې په پایله کې یې ۲۵ تنو ژوند له لاسه ورکړی او ۲۷ نور ټپيان شوي دي.
هغه د دغې پېښې د قربانیانو د هویت، جنسیت او ټپیانو د روغتیايي حالت په اړه څه نه دي ویلي.
د طالبانو د کورنیو چارو وزارت ویاند وايي، دغه پېښه د موټر چلوونکي د بې احتیاطۍ له امله رامنځ ته شوې ده.
دا پېښه پر داسې مهال رامنځ ته کېږي، چې تېره اوونۍ هم ۸۰ تنه هرات ولایت کې د یوه مسافر وړونکي موټر د ټکر له امله، چې ټوله سورلي یې له ایران څخه راغلي کډوال وو مړه شول.
هر کال د ښځو او ماشومانو په ګډون، لسګونه کسان د هېواد په ګوټ ګوټ کې د ترافیکي پېښو قرباني کېږي.
ډېری دغه ډول پېښې له قانوني حده زیات ګړندي تګ، د ترافیکي قوانینونو نه مراعت کولو، د سړکونو د تنګوالي او غیر معیاري والي او موټرو د زړښت له امله رامنځ ته کېږي.
