خوست کې سیمه ییز طالب چارواکي وايي، د دې ولایت په سپېرې ولسوالۍ، د پاکستان په هوايي برید کې درې ماشومان وژل شوي او د ښځو او ماشومانو په ګډون پنځه تنه نور ټپیان شوي دي.
رخشانه: خوست کې د طالبانو د والي ویاند مستغفر ګربز خبریالانو ته و ویل، دغه پېښه د چهارشنبې په شپه د (وږي ۵ مه) شاوخوا ۱۰:۳۰ بجې ډېورنډ فرضي کرښې ته څېرمه د سپېرې ولسوالۍ د سورکاخ په سیمه کې رامنځ ته شوې ده.
د هغه په وینا د پاکستان بې پیلوټه الوتکې د «حاجي نعیم ګل» په نوم د یوه کس پر کور بمبار کړی، چې په ترڅ کې یې د هغه درې ماشومان وژل شوي او د ښځو او ماشومانو په ګډون د کورنۍ پنځه غړي یې ټپیان شوي دي.
نوموړي زیاته کړې، ټپیان د درملنې په موخه روغتون ته لېږدول شوي او روغتیايي حالت یې ښه بلل شوی دی.
خوست کې د طالبانو د والي ویاند د یادې پېښې د قربانیانو د جنسیت، عمر او هویت په اړه څه نه دي ویلي.
ګربز تایید کړه، دغه کس چې پر کور یې پاکستان هوايي برید کړی، یو عادي سوداګر دی او له هېڅ ډلې سره تړاو نه لري.
نن سهار د ننګرهار ولایت سیمه ییزه طالب چارواکو هم ویلي و، چې د دې ولایت په شینوارو ولسوالۍ کې په دوه هوايي بریدونو کې یوه ښځه او درې ماشومان ټپيان شوي دي.
دغه پېښه هم د چهارشنبې په شپه د «وږي ۵ مه» ۱۱:۰۰ بجې د شینوارو ولسوالۍ د «اته ویشتمې ویالې» په سیمه کې رامنځ ته شوې، او په کې د شهسوار په نوم د یوه غیرنظامي کس کور وران شوی او د یوې ښځې په ګډون درې ماشومان په کې ټپيان شوي دي.
پاکستان د طالبانو په تېره څلور کلنه واکمنۍ کې له دې وړاندې هم څو ځلې د افغانستان ډېورنډ فرضي کرښې ته څېرمه د پاکستاني طالبانو (ټي ټي پي) د ځپلو په موخه ګڼ هوايي بریدونه کړي دي.
