په هېواد کې د ښځو د کار پر وړاندې د طالبانو د محدویتونو پر دوام کابل ښار کې سرچینې وايي، د طالبانو د امربالمعروف ځواکونو د دې ښار په یوولسمه ناحیه کې هغو ښځو ته چې پټ سینګارتونونه لري، خبرداری ورکړی چې خپل فعالیت ودروي.
رخشانه: کابل ښار کې یوې سرچینې رخشانې رسنۍ ته و ویل، دغه امر تازه د کابل ښار د یوولسمې ناحیې لپاره د طالبانو د امربالمعروف امریت له لوري صادر شوی دی.
د رخشانې رسنۍ سرچینې ویلي، دغه امر په یوه غږیز فایل کې د سینګارتون لرونکو ښځو واټساپي ګروپ ته لېږل شوی او هغوی ته یې خبرداری ورکړی، چې خپل فعالیت ودروي.
د طالبانو د دغه لارښود له مخې، له دې وروسته هېڅ ښځینه حق نه لري، چې په کور یا هم دوکان کې د سینګارولو فعالیت وکړي. طالبانو آریشګرو ښخو ته خبرداری ورکړی، چې که سرغړونه وکړي، قانوني چلند به ورسره وشي.
په غږیز فایل کې چې د رخشانې رسنۍ په واک کې ورکړل شوی اورېدل کېږي، چې د عباسي په نوم د کابل ښار د ۱۱ مې ناحیې د مخورو شورا رییس، د کوڅې استازو، ګذر وکیلانو او قومي مخورو ته وايي، سینګاروونکې ښځې د فعالیت اجازه نه لري.
د یوولسمې ناحیې د مخورو شورا رییس ویلي:«د ۱۱ مې ناحیې د امربالمعروف آمریت د لارښود سره سم له دې وروسته هېڅ [ښځه] په کور، دوکان او لوړ پوړیزه ودانۍ کې د سینګارولو په برخه کې د فعالیت حق نه لري.
هغه د خپلو خبرو پر دوام د ډلې غړو ته وايي، هغه ښځو ته چې په کورونو کې په پټه سینګارتونونه لري«سپارښتنه» وکړی چې خپل فعالیت ودري، که نه له هغوی سره«قانوني چلند تر سره کېږي او بیا به د شکایت حق ونه لري.»
په ورته وخت د کابل ښار د ۱۱ مې ناحیې د امربالمعروف یوه محتسب هم په دې غږیز فایل کې ویلي:«د سینګارتونونو موضوع یوه بدنامه او ناوړه پدیده، ده، چې باید «ډېر وخت وړاندې له منځه وړل شوې وای.»
هغه پر دوام د سینګارولو په برخه کې د ښځو فعالیت د «د اسلام له نظره خلاف» وباله وايي، د کابل ښار د یوولسمې ناحیې د علماوو شورا «باید ځای» د طالبانو د امربالمعروف ځواکونو سره د «سینګارتونونو» له منځه وړلو لپاره هڅې وکړي.
د طالبانو مشر د ۱۴۰۲ لمریز کال په زمري میاشت کې په ټول هېواد کې د ښځینه سینګارتونونو د فعالیت د بندېدو حکم صادر کړ.
د راپورونو له مخې د دې امر په پلي کېدو سره ۱۲ زره ښځینه سینګارتونونه، چې د هېواد په ګوټ کوټ کې یې فعالیت درلود او کابو پنځوس زره ارایشګرو ښخو په کې کار کاوه، بې کاره شول.
