د بشر حقونو له ۱۰۰ زیاتو مدافعینو او مدني ټولنې بنسټونو ملګرو ملتونو ته په یوه پرانستي لیک کې، د بامیان ولایت د پنجاب ولسوالۍ د رشک د کلي د ۲۵ کورینو په زور ایستل په کلکه غندلي او په دې برخه کې یې د ملګرو ملتونو د سملاسي اقدام غوښتنه کړې.
رخشانه: دغه لیک تېره ورځ(پنشنبې د وږي ۶ مه) د افغانستان لپاره د ملګرو ملتونو د سرمنشي ځانګړې استازې او په افغانستان کې د ملګرو ملتونو د استازولۍ (یوناما) مشرې رزا اوتنبایوا په ادرس لېږل شوی دی.
په دې لیک کې راغلي، طالبانو په کوچیانو پورې تړلو وسله والو کسانو سره یو ځای د چنګاښ په میاشت کې په دې ډلیزه ایستنه لاس پورې کړی وو.
د یاد لیک لاسلیک کوونکو ټینګار کړی، چې د دغې پېښې په تعقیب د یاد کلي د ښځو، ماشومانو او عمرخوړلو کسانو په ګډون ۴۱ تنه اړ شوي، چې تښېتنه او په پټه ژوند وکړي.
لاسلیک کوونکو خبرداری ورکړی، چې دا یوازې یوه ځانګړې پېښه نه ده، بلکې په افغانستان کې د هزارګانو د ځپنې، سیستماتیکې ربړونې او ځمکو د غصب یوه پراخه لړۍ شمېرل کېږي.
هغوی له ملګرو ملتونو په ځانګړې توګه د بشري حقونو شورا او په افغانستان کې د ملګرو ملتونو د استازولۍ (یوناما) څخه غوښتي، چې د کډه کړای شویو کورنیو د امنیت او بېرته ستنېدو تضمین وکړي، ځمکې او غصب شوي املاک بېرته خپلو اصلي څېښتنانو ته وسپاري او د هزارګانو پر کلیو د کوچیانو د پرلپسې یرغلونو مخنیوی وکړي.
دغه راز په دې لیک کې له یوناما غوښتیل شوي، چې په افغانستان کې د بشري حقونو د سړغړونو د عاملینو د څېړنې او محاکمې لپاره د حساب ورکولو یوه نړیواله کړنلاره رامنځ ته کړي.
لاسلیک کوونکو ټينګار کړی، چې د نه پاملرنې په صورت کې به د هزارګانو کورنۍ په ځانګړې توګه د رشک کلي اوسېدونکي د ډلیزې سزا او لا ځورولو سره مخ شي.
په دې لیک کې راغلي، په افغانستان کې د طالبانو د بیا ځلي واکمنېدو وروسته، هزاره ټولنه په پرلپسې توګه له خپلو ځمکو او جایدادونو محرومه یا اړ شوي، چې خپلې ځمکې بېرته له کوچیانو وپېري. کوچیانو د تېرو حکومتونو د زړو دعوو او تبعیضي پرېکړو پر اساس د هزارګانو له ځمکو د ګټې اخیستنې اسناد تر لاسه کړي او پر هغوی یې اضافي مالیې لګولې دي.
د دغه لیک لاسلیک کوونکو ویلي، په ورته وخت کې هزاره ګان په پرلپسې ډول د داعش تر بریدونو لاندې دي، چې د بشري حقونو د څار بنسټ د راپور پر اساس د بشریت پر وړاندې جنایت ته رسېږي. دغه بریدونه هم لکه د ځمکو غصب، هېڅ وخت په جدي توګه نه دی پلټل شوی.
کابو یوه میاشت وړاندې طالبانو د دې ولایت د پنجاب ولسوالۍ د «رشک پشته غرغری» د کلي ۲۵ کورونه، د والي په امر مهر و لاک او د دې کلي اوسېدونکي یې په زور کډوالۍ ته اړ کړل.
د افغانستان د بشري حقونو په برخه کې د ملګرو ملتونو ځانګړي راپور ورکوونکي ریچارډ بنټ هم اعلان وکړو چې د هزراګانو د جبري کډوالۍ په اړه پلټنې کوي.
