ننګرهار ولایت کې سیمه ییزه سرچینې وايي، د کونړ سیند کې د یوه ډوب شوي هلک جسد د ننګرهار ولایت کامې ولسوالۍ کې موندل شوی دی.
رخشانه: ننګرهار کې دوه سرچینو ویلي، د دې ماشوم جسد تېره ورځ ناوخته(شنبې د وږي ۸ مه) د دغه ولایت د کامې ولسوالۍ د «سنګرسرای» په سیمه کې موندل شوی دی.
د سرچینې په وینا، د دې ماشوم جسد د سیمې د خلکو له خوا له سیند نه راایستل شوی او روغتون ته لېږدول شوی دی.
د دې ماشوم د ډوبېدو، هویت، او عمر په اړه څه نه دي ویل شوي.
تر اوسه پورې ننګرهار کې سیمه ییزه طالب چارواکو هم په دې اړه څه نه دي ویلي.
ښايي د دې ماشوم جسد په تېرو څو ورځو کې د ننګرهار په یو شمېر ولسوالیو کې د سېلابونو له امله موندل شوی وي.
دغه راز د دې سختو بارانونو او سېلابونو له امله د ننګرهار په څلورو ولسوالیو کې د دوه نجونو په ګډون پنځه تنه مړه شوي او ۱۱۵ نور ټپيان شوي دي.
