د طالبانو د کورنیو چارو وزارت د خپرو شویو وروستیو شمېرو له مخې، د تېرې شپې په سخت زلزله کې یوازې په کونړ او ننګرهار ولایتونو کې ۶۲۲ تنه مړه او ۱۵۵۵ نور ټپیان شوي دي.
رخشانه: د طالبانو د کورنیو چارو وزارت ویاند عبدالمتین قانع په خپله اېکس پاڼه د یوې خبرپاڼې په خپرولو سره اعلان کړی، چې د دغه زلزلې ډېری قربانیان ښځې، ماشومان او سپین ږیري دي.
دغه زلزلې تېره شپه کابو ۱۲ بجې د کونړ ولایت نورګل، څوکۍ، وټپور، ماڼوګي او چپه دره ولسوالۍ سختې ولړزولې. په دغه ولایت کې د ښځو او ماشومانو په ګډون ۶۱۰ تنو ژوند له لاسه ورکړی او ۱۳۰۰ نور ټپیان شوي دي.
د قانع په وینا، د ننګرهار ولایت دره نور ولسوالۍ کې کې هم د زلزلې له امله د ښځو او ماشومانو په ګډون ۱۲ تنه مړه شوي او ۲۵۵ نور ټپیان شوي دي.
هغه زیاته کړې، دا لومړنۍ شمېرې دي او تر اوسه د مرګ ژوبلې او مالي زیانونو کره شمېره نه ده معلومه.
د سیمه ییزه رسنیو د راپورونو له مخې د کونړ ولایت د نورګل ولسوالۍ، څو کلي په بشپړه توګه ویران شوي دي.
طالبانو ویلي، مرستندویه ټیمونه او د سیمې خلک مرستې ته رسېدلي او دا مهال د خلکو په ژغورنې بوخت دي.
په ورته وخت د طالبانو تر کنټرول لاندې باختر آژانس لیکلي، لغمان ولایت کې هم د زلزلې له امله ۳۰ تنه چې ډېری یې ښځې او ماشومان دي، ټپیان شوي.
ننګرهار کې د رخشانې رسنۍ ځايي خبریال وايي، له تېرې نیمې شپې تر سهار پورې څو ځلې زلزلې د افغانستان ختیځ ولایتونه لړزولي دي.
لومړۍ زلزله د ریشتر په حساب شپږ درجې وه، چې د شپې ۱۱:۴۷ دقیقې د ننګرهار مرکز جلال آباد ښار څېرمه په ۲۷ کیلومتره ژوروالي کې رامنځ ته شوه.
