د کونړ مرکز اسعدآباد ښار کې سیمه ییزه سرچینې وايي، دغه ولایت کې د مرګونې زلزلې د ټپیانو څخه شپږو امیدواره مېرمنو، د ښځینه ډاکترانو د کمښت له امله ژوند له لاسه ورکړی دی.
رخشانه: د کونړ د عامې روغتیا ریاست یوې سرچینې د هویت پټ ساتلو سره رخشانې رسنۍ ته و ویل، دغو شپږو امیدواره مېرمنو نن (دوشنبې د وږي ۱۰ مه) ژوند له لاسه ورکړی دی.
د سرچینې په وینا، دغو شپږو امیدواره مېرمنو ته له زلزلې او کورونو د چتونو لوېدو وروسته خونریزي پيدا شوې او ماشومان ې سقط شوي وو، خو د ډاکترانو د کمښت له امله روغتون ته د لېږد پر مهال یې خپله هم ژوند له لاسه ورکړی دی.
د رخشانې رسنۍ سرچینې زیاته کړه، دغه مېرمنې د لرې پرتو سیمو څخه وې او روغتیايي خدماتو ته نه لاس رسی او د ښځینه ډاکترانو کمښت یې د مړینې اصلي لامل وو.
طالبانو د خصوصي روغتیايي انستېتیوتونو دروازې د نجونو پر مخ تړلې او هغوی یې په دې برخه کې له زده کړو محرومې کړې دي.
په ورته وخت د سیمې اوسېدونکي د بېړنیو مرستو او د دغې مرګونې طبیعي پېښې ټپیانو ته د رسېدنې غوښتنه کوي.
طالبانو ویلي، د هېواد په ختیځ کې د شوې مرګونې زلزلې د مړو شویو شمېر ۸۱۲ تنو او د ټپیانو شمېر ۲ زره او ۸۱۷ تنو ته رسېدلی دی.
یوازې کونړ ولایت کې تر اوسه ۸۰۰ تنه وژل شوي او دوه زره او ۵۰۰ نور ټپیان شوي دي او څو کلي د تېرې شپې د زلزلې له امله په بشپړه توګه ویجاړ شوي دي.
خپرې شوې شمېرې وروستۍ نه دي او هره لحظه امکان لري بدلون وکړي.
