د هېواد په ختیځ کې د مرګونې زلزلې په ترځ کې ملګرو ملتونو اعلان کړی، چې د دې بنسټ مرستندویه ټیمونه د بېړنیو مرستو او ژغورنې په موخه سیمې ته لېږل شوي دي.
رخشانه: تېره شپه (یکشنبې د وږي ۹ مه) کابو ۱۲:۰۰ بجې د ریشتر په کچه ۶.۲ درجې، زورورې زلزلې د هېواد ختیځ، کونړ، ننګرهار، لغمان او نورستان ولایتونه سخت ولړزول. د وروستیو شمېرو له مخې تر اوسه ۶۲۲ تنه وژل شوي او ۱۵۵۰ نور ټپیان شوي دي.
ملګرو ملتونو نن سهار(دوشنبې د وږي ۱۰ مه) په خپله اېکس پاڼه د یوې پوسټ په خپرولو سره لیکلي، د افغانستان په ختیځ کې د «ویجاړونکو» زلزلو له امله سلګونو تنو ژوند له لاسه ورکړی او سلګونه نور ټپيان شوي دي.
یاد بنسټ د قربانیانو له کورنیو سره خواخوږي څرګنده او اعلان یې کړی، چې د دغه سازمان بنسټونه، د قربانیانو سره د مرستې او ژغورنې په موخه سیمې ته لېږل شوي دي.
د ملګرو ملتونو سرمنشي انتونیو ګوترش هم د هېواد په ختیځ کې د شوې زلزلې له امله د خلکو سره خواږي څرګنده کړې او د دغه پېښې د ټپيانو لپاره یې د روغتیا غوښتنه کړې ده.
نوموړي په خپله اېکس پاڼه لیکلي، په افغانستان کې د ملګرو ملتونو ټیمونه منسجم شوي او زیانمنو کسانو سره به د مرستې په پار هېڅ ډول هڅې ونه سپموي.
په ورته وخت د افغانستان لپاره د ملګرو ملتونو د بشري حقونو شورا ځانګړي استازي ریچارډ بنټ هم د قربانیانو له کورنیو او ځپل شوې ټولنې سره خپله خواخوږي څرګنده کړې ده.
افغانستان کې د روغتیا نړیوال سازمان هم په خپله اېکس پاڼه لیکلي، چې د دوی ټيمونه هم په روغتونونو او روغتیايي مرکزونو کې ځای پر ځای شوي دي.
د ملګرو ملتونو دغه بنسټ د دغه پېښې د ټپيانو په بېړنۍ درملنې ټینګار کړی وايي، د خدماتو په وړاندې کولو سره، د خلکو د ځان ژغورنې په لټه کې دي.
د ملګرو ملتونو د مرستو د همغږۍ دفتر (اوچا) هم اعلان کړی، چې د خپلو بشري شریکانو سره یو ځای د پېښې په ځای کې شتون لري او د بېړنیو مرستو رسولو هڅې یې پیل کړې دي.
د ملګرو ملتونو د وګړو صندوق هم ویلي، له خپلو شریکانو سره یو ځای په سیمه کې شتون لري، تر څو د افغانستان په ختیځ کې د ویجاړونکې زلزلې له زیانمنو سره روغتیايي، رواني- ټولنیزې مرستې وکړي.
