د طالبانو ویاند ذبیح الله مجاهد ویلي، د هېواد ختیځ کې د شوې زلزلې، د مړو شمېر ۸۱۲ او د ټپیان شمېر ۲۸۱۷ تنو ته رسېدلی دی.
رخشانه: مجاهد نن (شنبې د وږي ۱۰ مه) کابل کې د یوې خبري ناستې پر مهال و ویل، تر اوسه یوازې په کونړ ولایت کې ۸۰۰ تنه مړه او دوه زره او ۵۰۰ نور ټپیان شوي دي.
د طالبانو ویاند زیاته کړې، د دغې زلزلې له امله، ننګرهار ولایت کې هم ۱۲ تنو ژوند له لاسه ورکړی او ۲۵۵ نور ټپیان شوي دي.
د هغه په وینا، ۵۸ تنه نور په لغمان او څلور تنه په نورستان ولایت کې د زلزلې له امله ټپیان شوي دي.
د طالبانو ویاند په دې خبري ناسته کې و ویل، دغه راز پنجشېر ولایت کې هم د زلزلې له امله ۵ کورونه ویجاړ شوي، خو مرګ ژوبله نه لري.
د طالبانو له لوري خپرې شوې شمېرې وروستۍ نه دي او هره لحظه کېدای شي بدلون وکړي.
طالبانو سیمې ته د ژغورونکو او مرستندویه ډلو د لېږلو خبر ورکړی وايي، د بندو کسانو د ژغورنې عملیات روان دي.
