د طالبانو ویاند او افغاني سرې میاشتې ټولنې یو په بل پسې اعلان کړی، چې د وړمې شپې د زلزلې د قربانیانو شمېر یو زر ۴۱۱ تنه مړو او درې زره ۱۳۴ تنو ټپیانو ته ورسېد.
رخشانه: افغاني سرې میاشتې ټولنې نن (سه شنبې د وږي ۱۱ مه) اعلان کړی، چې د وروستیو شمېرو له مخې، یوازې کونړ ولایت کې د زلزلې له امله یو زر ۱۲۴ تنو ژوند له لاسه ورکړی او درې سره ۲۵۱ نور ټپیان شوي دي.
افغاني سرې میاشتې ټولنې په خپله اېکس پاڼه لیکلي، ډېری خلک لا هم تر ورانو ویجاړو لاندې بند پاتې دي.
دغه ټولنې زیاته کړې، د زلزلې له امله کونړ ولایت کې ۸ زره د استوګنې کورنه ویجاړ شوي دي.
یاد مرستندویه بنسټ وايي، د زیانمنو کسانو د ژغورنې عملیات دوام لري.
افغاني سرې میاشتې ټولنې د زلزلې ځواک د ریشتر په کچه ۶.۱ درجې ښودلې وايي، مرکز یې کونړ ولایت وو.
طالبانو یوه ورځ وړاندې ویلي وو، د یکشنبې شپې د زلزلې له امله په کونړ، نورستان، ننګرهار او لغمان ولایتونو کې له ۸۰۰ زیات کسانو ژوند له لاسه ورکړی او ۲۰۰۰ کسان ټپیان شوي دي.
خو طالب ویاند ذبیح الله مجاهد نن (سه شنبې د وږي ۱۱ مه) په خپله اېکس پاڼه د زلزلې د قربانیانو وروستۍ شمېرې تر دې لوړې اعلان کړې دي.
مجاهد وايي، د وړمې شپې په زلزله کې یوازې په کونړ ولایت کې یو زر او ۴۱۱ تنه مړه شوي او درې زره او ۱۲۴ تنه نور ټپیان شوي دي.
نوموړي دا هم ویلي، دغه ولایت کې ۵۴۱۲ د استوګنې کورونه هم د زلزلې له امله ویجاړ شوي دي.
د یادونې ده، چې له دېرشو ساعتونو په تېرېدو لا هم د زلزلې په سیمه کې تر کنډوالو لاندې د بند پاتې کسانو د ژغورنې عملیات دوام لري.
د دغې مرګونې طبیعي پېښې ډېری قربانیان او ټپیان ښځې، ماشومان او عمرخوړلي کسان دي
