د طالبانو مرستیال ویاند حمدالله فطرت وايي، کونړ ولایت کې د مرګونې زلزلې د مړو شویو کسانو شمېره دوه زره او ۲۰۵ تنو ته رسېدلی دی.
رخشانه: فطرت نن (پنشنبې د وږي ۱۳ مه) په خپله اېکس پاڼه د یوه پوسټ په خپرولو سره لیکلي، د دغه طبیعي پېښې د ټپیانو شمېر درې زره او ۶۴۰ تنو ته رسېدلی دی.
د مرګ ژوبلې کچه هله لوړه شوه، چې د کونړ ولایت د نورګل ولسوالۍ له«مزار درې» د څوکۍ ولسوالۍ له «دېوګل درې او ماڼوګي او چپې درې ولسوالیو څخه نور مړي او ټپيان راوایستل شول.
د هېواد په ختیځو ولایتونو کې د یکشنبې د شپې د مرګونې زلزلې ډېری قربانیان ښځې، ماشومان او عمرخوړلي کسان دي.
د زلزلې څخه د څلورو ورځو په تېرېدو سره لا هم د ژغورنې او پلټنې عملیات په زلزله ځپلو سیمو کې دوام لري.
تر اوسه معلومه نه ده، چې څومره جسدونه تر کنډوالو او خاورو لاندې پاتې دي.
طالبانو تېره ورځ د دغې زلزلې د مړو شویو کسانو شمېر یوزر او ۴۵۷ تنه او د ټپیانو هغه درې زره او ۳۹۴ تنه ښودلې وو.
په دې طبعي پېښه کې له ۷۸۲ زیات کورونه نړېدلي دي.
ځينو رسنیو لیکلي، چې د نن ورځې له ماسپښین وروسته یو ځل بیا د کونړ ولایت ځینې سیمې زلزلې ولړزولې.
معلومه نه ده، چې په دې ټکانونو کې چا ته مرګ ژوبله اوښتې او که نه.
