د طالبانو ډلې روانه اوونۍ د شپږو ښځو په ګډون ۲۳ تنه د بېلابېلو تورونو له امله په جوزجان، بدخشان او کابل کې، د خلکو پر وړاندې په دورو وهلي دي.
رخشانه: دغه کسان د «نامشروع اړیکو، له واده پرته جنسي اړیکې، غلا، نشه کوونکو ګولیو، الکولي مشروباتو، چرسو د پېر، پلور او قاچاق، او ناروا نکاح» په تور په عام محضر کې په دورو وهلي.
د شنبې په ورځ د (وږي ۸ مه) د یوې ښځې په ګډون دوه تنه د «نامشروع اړیکې» په تور د جوزجان ولایت په آقچه ولسوالۍ کې د خلکو پر وړاندې ۱۵ دورې وهل شوي او له شپږو میاشتو تر یوه کال پورې د تنفذي بند سزا ورته واورول شوه.
د یکشنبې په ورځ د (وږي ۹ مه) د دریو ښخو په ګډون ۷ تنه د «له واده پرته جنسي اړیکې او غلا» په تورونو، په بدخشان ولایت کې د خلکو پر وړاندې ۳۹ دورې وهل شوي دي.
دغه کسان د بدخشان ولایت د ښاري ابتدایه محکمې د دیوان د پرېکړې له امخې له یوه تر دوه نیم کاله تنفذي بند هم محکوم شوي دي.
د دوشنبې په ورځ د (وږي ۱۰ مه) ۱۲ تنه د «نشه کوونکو ګولیو، الګولي مشروباتو او چرسو د پېر، پلور او قاچاق» په تورونو، په کابل ولایت کې د خلکو پر وړاندې له ۱۰ تر ۳۹ پورې دورې وهل شوي دي.
دغه کسان کابل کې د طالبانو د نشه يي توکو او مسکراتو ضد محکمې له خوا له اوو تر دوه کالو پورې په تنفذي بند هم محکوم شوي دي.
د سه شنبې په ورځ د (وږي ۱۱ مه) یوه ښځه د «له واده پرته جنسي اړیکې» په تور په کابل کې ۳۹ دورې وهل شوې او دوه کاله تنفذي بند سزا هم ورته اورول شوې ده.
د پنشنبې په ورځ د (وږي ۱۳ مه) یوه ښځه د «نامشروع نکاح» په تور د جوزجان ولایت په درزاب ولسوالۍ کې د خلکو پر وړاندې ۳۹ دورې وهل شوې او د یو کال تنفذي بند سزا هم ورکړل شوې ده.
طالبانو تېره اوونۍ هم د اوو ښځو په ګډون ۳۰ تنه په شپږو ولایتونو کې په دورو وهلي وو.
