په افغانستان کې د ملګرو ملتونو د ماشومانو د ملاتړ صندوق (یونیسف) استازی ډاکتر تاج الدین اویوالي وايي، په بېړنیو حالاتو کې لکه زلزله د ښځینه روغتیايي کارکوونکو شتون خورا اړین دی.
رخشانه: ایوالي نن (پنشنبې د وږي ۱۳ مه) په خپله اېکس پاڼه د یوه پوسټ په لیکلو سره ویلي، ښځینه روغتیايي کارکوونکې زیانمونو، په ځانګړې توګه ماشومانو او ښځو ته خدمات وړاندې کوي.
هغه وزیاته کړې:«ښځینه روغتیايي کارکوونکې له هغو ماشومانو، ښځو او نارینه وو سره مرسته کوي، چې ښايي له پامه غورځول شوي وي.
په افغانستان کې د یونیسف استازي ټینګار کړی، چې د دغه بنسټ تر ملاتړ لاندې ګرځنده ټیمونه هڅه کوي، روغتیايي مرکزونو ته په رسېدنې سره په زیانمنو شویو سیمو کې ژغورونکي خدمات وړاندې کړي.
د ملګرو ملتونو د ښځو څانګې هم تېره شپه ناوخته اعلان کړی، چې د دغه بنسټ ټیمونه له ساعتونو پیاده مزل وروسته د کونړ ولایت نورګل ولسوالۍ ته رسېدلي دي.
د دغه بنسټ په وینا، په دې سیمه کې ښځو او نجونو ویلي، سرپناه، خوراکي توکي، پاکې اوبه، جامې، روغتیايي خدمات، رواني- ټولنیز ملاتړ د دوی بېړنۍ اړتیاوې دي.
له دې مخکې د کونړ مرکز کې سرچینو رخشانې رسنۍ ته ویلي و، چې شپږ تنه امیدواره مېرمنې، د ښځینه ډاکترانو د کمښت له امله خونریزې پیدا کړې او مړې شوې دي.
د یکشنبې د شپې زلزلې د کونړ ولایت څلور ولسوالیو کې دوه زره او ۲۰۵ تنه وژلي او درې زره او ۶۴۰ تنه نور ټپيان شوي دي
