کونړ کې سیمه ییزې سرچینې وايي، په دغه ولایت کې د مرګونې زلزلې یو شمېر زیانمنې مېرمنې، د ښځینه مرستندویانو او ژغورونکو له کمښته سر ټکوي.
د سرچینې په وینا، زیانمنو ښځو ته د مرستو رسولو په موخه د ښځینه مرستندویانو کمښت یوه جدي ستونزه شمېرل کېږي.
د کونړ څوکۍ ولسوالۍ کې یوه مېرمن چې د کورنۍ ۹ غړي یې په زلزله کې له لاسه ورکړي وايي، د ښځینه مرستندویانو د کمښت له امله نه شي کولی خپلې روغتیايي ستونزې، له نارینه مرستندویانو سره شریکې کړي.
پروانې رخشانې رسنۍ ته و ویل:«له ځمکلړزې وروسته ټولو مرستندویانو مرستې وېشلې. خو د مرستو د وېش پر مهال له مرستندویه بنسټونو سره هېڅ ښځې شتون نه درلود، موږ ښځو ته اړتیا لرو، ښځې شته خو شمېر یې لږ دی، موږ نه شو کولی ټول څه نارینه وو ته و وایو.»
د هغې په وینا، د ښځو د روغتیايي ستونزو د لرې کولو لپاره د ښځینه مرستندویانو شتون یوه بېړنۍ اړتیا ده.
د کونړ مزار دره کې یوې سرچینې هم د ښځینه مرستندویانو پر حضور ټينګار وکړ وايي، د ښځو له فعال شتون او همکارۍ پرته، کورنیو په ځانګړې توګه ښځو او نجونو ته د مرستو رسول نیمګړي دي.
له بل لوري یوه ښځینه داوطلبه چې د ژغورنې او مرستې رسونې په عملیاتو کې یې ګډون کړی وايي، د ښځینه مرستندویانو کمښت ان د ښځو د جسدونو د خښولو برخه کې هم لویه ستونزه رامنځ ته کړې ده.
هغې چې نه غوښتل نوم یې په دې خبر کې یاد شي وايي، نارینه د ښخو په ناروغیو نه پوهېږي، یوازې ښځې کولی شي له هغوی سره خبرې اترې وکړي او پر مشکلاتو یې ځان پوه کړي.
دغه مرسته رسوونکې مېرمنې زیاته کړه:«په لومړۍ ورخ چې د مرستې لپاره لاړم، د مړو د منځلو لپاره هېڅ ښخې شتون نه درلود، یوازې دوه مېرمنې هلته وې، چې هغوی هم ټپيانې شوې وې، هغوی ښځې مینځلې او په کفن کولې یې.»
نیویارک ټایمز څو ورځې وړاندې په یوه راپور کې لیکلي وو، نارینه مرستندویان، د هېواد په ختیځو ولایتونو کې د مرګونې ځمکلړزې زیانمن شویو ښځو سره مرسته نه ده کړې.
په دې راپور کې راوړل شوي، د ښخو تر منځ د سړیو شتون د دې لامل شوی، چې د ډېری ښځینه ټپیانو درملنه ونه شي او یو شمېر د هغوی لا هم تر کنډوالو او خاورو لاندې دي.
له دې وړاندې هم کونړ کې یوې سرچینې رخشانې رسنۍ ته ویلي وو، له زلزلې زیانمنو شویو شپږو امیدواره مېرمنو د ښځینه ډاکترانو د کمښت له امله خپل ژوند له لاسه ورکړی وو.
