په افغانستان کې د ملګرو ملتونو د ښځو څانګې (UN Women) د مور او ماشوم د مړینې زیاتوالي او د کم عمره ودونو له امله، ځوانو نجونو کې د زېږون د لوړې کچې په اړه خبرداری ورکړی دی.
رخشانه: دغه بنسټ نن (یکشنبې د وږي ۱۶ مه) په خپله اېکس پاڼه د یوه پوسټ په خپرولو سره، د طالبانو تر واک لاندې افغانستان کې د ښځو د روغتیا او حقونو د وضعیت په اړه اندېښنه څرګنده کړې ده.
د ملګرو ملتونو د ښځو څانګې په اعلامیه کې راغلي:«د مور او ماشوم د مړینې کچه په زیاتېدو ده، په ځانګړې توګه د ماشومانو د ودونو له امله په نویو ځوانو نجونو کې د زېږون کچه لوړه شوې ده.»
دغه بنسټ ټینګار کړی، چې د افغان ښځو لپاره روغتیايي پاملرنې ته لاسرسی ورځ بلې ستونزمن شوی دی.
د یاد بنسټ په وینا، د طالبانو له واکمنېدو سره وېرې، د تګ راتګ محدویتونو، له زده کړو بندیز او سیتماتیک توپیري چلند، ښځې او نجونې د دوی د اړتیا وړ پاملرنې څخه بې برخې کړې دي.
د ملګرو ملتونو د ښځو څانګې راوړي:«د وېرې چاپېریال ډېری ښځې ان له کوره وتلو څخه راګرځولې. هغه ښځې چې لنډ او غیر روغتیايي ژوند لري او ډېری د هغو، ان نه شي کولی د خپلې روغتیا په اړه هم پرېکړه وکړي.»
دغه بنسټ د ښځو پر وړاندې د طالبانو محدویتونو ته په اشارې ویلي، په کورونو کې بندېدو د هغوی پر رواني روغتیا ژوره اغېزه کړې دي.
د ملګرو ملتونو د ښځو څانګه وايي، له دې محدودیتونو سره سره افغان ښځو او نجونو له ځانه ځواک، وړتیا او مېړانه ښودلې، خو هغوی نه باید اړ وي، چې په یوازې ځان له ستونزو سره مخ شي.
یاد بنسټ ټینګار کړی، چې نړۍ د بېړنیو اړتیاو د پوره کولو لپاره نه، بلکې د یوه راتلونکي نسل د خوندیتوب لپاره باید ژر تر ژره اقدام وکړي.
د ملګرو ملتونو د ښځو څانګې څه موده وړاندې په یوه راپور کې لیکلي وو، چې د نجونو پر زده کړو د طالبانو محدویتونه به تر ۲۰۲۶ میلادي کال پورې په نجونو کې د کم عمره ودونو کچه ۲۵ سلنه لوړه کړي.
دې بنسټ دغه راز ویلي وو، د ښځو پر زده کړو د طالبانو محدویتونه به د تنکیو نجونو منځ کې، د وخت څخه مخکې زېږون کچه ۴۵ سلنه او د مور او ماشوم د مړینې کچه کم تر کمه ۵۰ سلنه لوړه کړي.
معترضو ښځو، د بشري حقونو او ملګرو ملتونو بنسټونو په وار وار د ښځو د حقونو او اساسي خپلواکیو، په ځانګړې توګه له زده کړو د مخنیوي په اړه اندېښڼه څرګنده کړې ده
