غزني او بدخشان کې سیمه ییزه طالب چارواکي وايي، د دو ښځو او اوو ماشومانو په ګډون ۱۷ تنه په دوه ترافیکي پېښو کې، په دغه ولایتونو کې مړه شوي او یوه ماشوم په ګډون پنځه تنه نور ټپیان شوي دي.
رخشانه: د یوه مسافر وړونکي ۵۸۰ بس موټر او یوه واړه فیلډر موټر د ټکر له امله، د یوې ښځې او څلورو ماشومانو په ګډون شپږو تنو ژوند له لاسه ورکړی او څلور نور ټپیان شوي دي.
غزني کې د طالبانو امنیه قومانداني وايي، دغه ترافیکي پېښه نن سهار (دوشنبې د وږي ۱۷ مه) د غزني ښار د لومړۍ امنیتي حوزې د «روضې» کوتل په سیمه کې رامنځ ته شوې ده.
د دغې پېښې شپږ تنه قربانیان د یوې کورنۍ غړي دي.
غزني کې د طالبانو امنیه قوماندانۍ د دغه ترافیکي پېښې د ټپیانو د هویت، عمر، جنسیت او روغتیايي وضعیت په اړه څه نه دي ویلي.
د موټر چلوونکو بې پروايي د دغې پېښې د رامنځ ته کېدو لامل بلل شوی دی.
په ورته وخت د بدخشان ولایت په درایم ولسوالۍ کې د یوې ترافیکي پېښې له امله، د یوې ښځې او درې ماشومانو په ګډون ۱۱ تنو ژوند له لاسه ورکړی او یو ماشوم سخت ټپي شوی دی.
بدخشان کې د طالبانو د امنیه قوماندانۍ ویاند احسان الله کامګار وايي، دغه پېښه نن (دوشنبې د وږي ۱۷ مه) د دې ولایت د درایم ولسوالۍ د زرک په سیمه کې رامنځ ته شوې ده.
دغه پېښه له سړک څخه د یوه سراچه ډول موټر د اوښتو او چپه کېدو له امله رامنځ ته شوې، چې په ترڅ کې یې د یوې ښځې او دریو ماشومانو په ګډون ۱۱ تنو ژوند له لاسه ورکړی او یو ماشوم سخت ټپي شوی دی.
د بدخشان درایم ولسوالۍ کې د طالبانو امنیه قوماندان سید منیر ویلي، د دغې ترافیکي پېښې د قربانیانو څخه اووه تنه د یوې کورنۍ غړي دي.
تر اوسه پورې د دې ترافيکي پېښې د رامنځ ته کېدو دلیل نه دی معلوم شوی.
