په افغانستان کې د ملګرو ملتونو د وګړو صندوق (UNFPA) اعلان کړي، چې کونړ او ننګرهار ولایتونو کې د شوې زلزلې، له ۵۰ سلنه زیات قربانیان ښخې او نجونې دي.
رخشانه: دغه سازمان نن (دوشنبې د وږي ۱۷ مه) په یوه راپور کې لیکلي، چې دغه دوه ولایتونو ته یې، د زلزله ځپلو سره د بېړنیو خدماتو رسولو په موخه، پنځه ګرځنده روغتیايي ټيمونه لېږلي دي.
د ملګرو ملتونو د وګړو صندوق په راپور کې راغلي، لېږل شویو ټیمونو تر اوسه پورې نهه زره او ۵۰۰ کسانو ته حیاتي خدمات، لکه د زېږون پاملرنې، رواني- ټولنیزې مشورې او عمومي روغتیايي خدمات وړاندې کړي دي.
دغه بنسټ ویلي، د دغې مرګونې طبعیي پښې ټول اړخونه لا هم معلوم نه دي، ځکه«غرنیو او لرې پرتو کلیوالو سیمو ته لاس رسی خورا ستونزمن او پېچلی دی.»
په راپور کې راوړل شوي، د دې پېښې د یو زره او ۴۵۷ تنو مړو او درې زره او ۳۸۱ ټپیانو پرته، ګڼو ښځو او ماشومانو ته جسمي او روانې زیانونه رسېدلي او ډېری یې له روحي ستونزو سره مخ دي.
د ملګرو ملتونو د وګړو صندوق (UNFPA) تر ملاتړ لاندې د رواني او ټولنیزو مشورو سلاکاره موسکا چې زلزله ځپلو سیمو ته لېږل شوې، وايي، له زلزلې ژوندي پاتې شویو قربانیانو سخت رواني زیانونه لیدلي دي.
هغې ویلي، د رواني سلا ورکولو ټیمونو هڅه کوي، د خواخوږۍ ملاتړ، درملو، روغتیايي بستو او نورو ټولنیزو اړینو اړتیاو په وړاندې کولو سره د هغوی غم راکم کړي.
نوموړې زیاته کړې:«ښځې او ماشومان په ځانګړې توګه له زیاتې وېرې سره مخ دي، په دې حساس وخت کې زیانمن شوي کسان زموږ مرستې ته اړتیا لري.»
په راپور کې د یوې ښځې په حواله، چې مور، خور او ورور یې په دې پېښه کې له لاسه ورکړي راوړل شوي، چې هغه درې ځلې د ملګرو ملتونو د وګړو صندوق تر ملاتړ لاندې د رواني سلا لېږل شوي روغتیايي مرکز ته ورغلې ده.
دغې ښځې ویلي:«کله چې له ښځینه سلاکارې سره خبرې کوم، حالت مې ښه کېږي.»
ملګرو ملتونو وړاندوینه کړې، چې کابو ۱۱ زره او ۶۰۰ امیدواره مېرمنې د زلزلې تر اغېز لاندې دي، هغه هم په داسې یوه هېواد کې، چې په کې د اسیا په کچه د مور او ماشوم مړینه په کې زیاته ده.
د هېواد په ختیځو ولایتونو کې د مرګونې زلزلې او د هغې د وروستیو ټکانونو څخه د لسو ورځو په تېرېدو لا هم د ژغونې او له کنډوالو لاندې کسانو د جسدونو را ایستلو عملیات دوام لري.
تر اوسه پورې د هېواد په ختیځو ولایتونو کې د شوې زلزلې د مرګ ژوبلې او مالی زیانونو په اړه کره معلومات په لاس کې نشته.
