د افغانستان لپاره د ملګرو ملتونو د سرمنشي ځانګړې استازې او یوناما مشرې رزا اوتنبایوا په افغانستان کې په ځانګړې توګه د ښځو او نجونو لپاره پر برابرو او پراخو زده کړو ټينګار وکړ.
رخشانه: اوتنبایوا نن (دوشنبې د وږي ۱۷ مه) د سواد نړیوالې ورځې په مناسب پر خپله اېکس پاڼه لیکلي، کتابونه د تل پاتې سوکالۍ پر لور لار ده.
هغې لیکلي، ملګري ملتونه په افغانستان کې د سودا نړیوالې ورځې او د هېواد ارزښتناکه ادبي میراث ته درناوی لري.
په افغانستان کې د ملګرو ملتونو علمي او د زده کړو سازمان (یونسکو) هم پر خپله اېکس پاڼه لیکلي، سواد تر لوستلو او لیکلو ورپورته دي.
یاد بنسټ ویلي، سودا د افغانستان لپاره د مهارتونو، کارموندنې او یوې پیاوړې راتلونکې لپاره یوه لار ده.
۱۴۵۰ ورځې کېږي، چې طالبانو له شپږم ټولکي پورته نجونو پر مخ د ښوونځیو دروازې تړلې او له درې کلونو زیاته موده کېږي، چې ښځې او نجونې په پوهنتونونو کې له زده کړو راګرځول شوې دي.
د راپورونو له مخې د افغانستان د وګړو شاوخوا لس میلیونه کسان د لوستلو او لیکولو پوه نه لري.
د سواد نړیواله ورځ په ۱۹۶۷ میلادي کال کې د یونسکو له خوا ونمول شوه او هر کال له زده کړو او ودې د ملاتړ په پار دغه ورځ لمانځل کېږي.
