فراه کې سیمه ییز طالب چارواکي وايي، د دغه ولایت د بالابلوک ولسوالۍ د استوګنې په یوه کور کې د چاودنې له امله، د دغې کورنۍ اتو تنو غړو ژوند بایللی دی.
رخشانه: فراه کې د طالبانو د امینه قوماندانۍ ویاند محمد نسیم بدري سیمه ییزه رسنیو ته ویلي، دغه پېښه تېره ورځ(دوشنبې د وږي ۱۷ مه) د دې ولایت د بالابلوک ولسوالۍ د «نوآباد» په کلي کې رامنځ ته شوې ده.
د بدري په وینا، چاودېدونکي توکي د محمد جان په نوم د یوه کس په کور چاودنه کړې، چې له امله یې دی خپله، مېرمنې، څلور زامن او دوه لونې یې وژل شوي دي.
په هغه انځورونو کې چې له دغې پېښې پر خواله رسنیو خپاره شوي لیدل کېږي، چې د استوګنې یو کور په بشپړه توګه ویجاړ شوی دی.
فراه کې د طالبانو د امنیه قوماندانۍ ویاند، د دغه چاودېدونکو توکو د ماهیت او د پېښې د رامنځ ته کېدو د څرنګوالي په اړه څه نه دي ویلي.
هر کال د هېواد په ګوټ ګوټ کې لسګونه کسان د جګړو څخه د پاتې شویو ماینونو قرباني کېږي. د چاوېدونکو توکو ډېری قربانیان ماشومان دي
