د ملګرو ملتونو د بشري حقونو د څار بنسټ وايي، افغانستان کې د طالبانو له لوري د ښځو د ځپنې په ژورېدو سره، باید یوه خپلواکه او ځواب ویوونکې کړنلاره رامنځ ته کړای شي.
رخشانه: دغه بنسټ نن (دوشنبې د وږي ۱۷ مه) د ملګرو ملتونو د بشري حقونو شورا له ۶۰ مې غوندې سره هم مهاله په یوه اعلامیه کې لیکي، طالبانو په افغانستان کې د ښځو او نجونو د حقونو پر وړاندې خپلو بریدونو ته زور ورکړی دی.
د بشري حقونو د څار بنسټ په اعلامیه کې راغلي، د ښځو او نجونو پر حقونو د طالبانو پراخ او سیستماتیک محدویتونه د «کړونې او جنستي ځورونې» چوکاټ کې د بشریت پر وړاندې جنایت جوړوي، چې د ملګرو ملتونو کارپوهانو هغه «جنسیتي توپیر» بللی دی.
دغه بنسټ ویلي، د تګ راتګ او بیان پر آزادۍ سختو محدویتونو پراخوالی موندلی او مخکې له مخکې یې د ښځو مدني، سیاسي، اقتصادي، ټولنیز او فرهنګي حقونه محدود کړي دي.
د بشري حقونو د څار بنسټ ټينګار کړی، چې د طالبانو له خوا د ښځو د ځپنې ژورېدو سره د بشري حقونو شورا د یوې بېړنۍ هراړخیزه او ځواب ویونکې کړنلارې رامنځ ته کولو ته اړتیا لري.
د دې بنسټ په وینا، دغه کړنلاره باید ځانګړې خو د ځانګړي راپور ورکوونکي د کار بشپړوونکې وي او د هغې موخه به په افغانستان کې د تېرو او راروانو سرغړونو، په ځانګړې توګه د طالبانو له خوا د ښځو او نجونو پر وړاندې د جرمونو پلټنه وي.
د بشري حقونو د څار بنسټ ویلي، د یوې ځواب ویوونکې کړنلارې رامنځ ته کول به، د افغانستان د بشري حقونو د کړکېچ په زړه کې د اداري خوندیتوب سره د مبارزې لپاره یوه حیاتي وسیله وي او دا به عدالت، ريښتینولۍ او د سرغړونو قربانیانو ته د تاوان ورکولو لاس رسی پیاوړی کوي.
دغه بنسټ په افغانستان کې د طالبانو له لوري د ښخو او نجونو پر زده کړو او تحصیل محدویتونو ته په اشارې وايي، نور انتظار نه شي کولی او د ملګرو ملتونو د بشري حقونو شورا باید په همدې ناسته کې، یوه پیاوړې او ځواب ویوونکې کړنلاره رامنځ ته کړي.
د بشري حقونو د څار بنسټ ویلي، افغان ښځې او نجونې د دوی پر حقونو د طالبانو له محدویتونو سره مقاومت کوي او د بشري حقونو بنسټونه باید په عملي اقداماتو سره د هغوی تر څنګ ودرېږي.
