د کابل په لوېدیځ کې سرچینې وايي، د طالبانو د امربالمعروف ځواکونو په دشت برچي سیمه کې یوه ځوانه نجلۍ نیولې او له ځان سره یې بېولې ده.
رخشانه: دشت برچي کې دوه سرچینو رخشانې رسنۍ ته و ویل، دغه ځوانه نجلۍ تېره ورځ مازیګر مهال(سه شنبې د وږي ۱۸ مه) د ټانګ تېل په سیمه کې نیول شوې ده.
د سرچینې په وینا، د طالبانو د امربالمعروف ځواکونو د ښځینه ځواک له شتون پرته، دغه ځوانه نجلۍ له یوې زنانه خیاطۍ څخه راوایسته او له ځان سره یې بوتله.
د رخشانې د سرچینو د خبرو پر اساس دغه ځوانه نجلۍ تر نیولو وړاندې طالبانو په خیاطۍ کې وهلې ډبولې هم ده.
یوې له سرچینو و ویل:«خیاطۍ ته په رسېدو مې سترګې د طالبانو د امربالمعروف پر یو تن ولګېدې چې د خیاطۍ له داخل څخه د باندې راووت، هغه له ځان سره یوه شاوخوا ۱۶ کلنه نجلۍ هم راوایسته او د دوه موتر پر لور چې د کوڅې په پای کې ولاړ وو یووړه.»
هغه د خیاط په حواله وايي، دغه نجلۍ له کور څخه تر وتلو وروسته د طالبانو د امربالمعروف ځواکونو له خوا څارل کېده او وروسته د خیاطۍ د ننه ونیول شوه.
د رخشانې رسنۍ په وینا، دغې ځوانې نجلۍ مناسب حجاب درلود.
تر اوسه د دې ځوانې نجلۍ د نیولو دلیل نه دی روښانه شوی او معلومه نه ده چې هغه چېرته لېږدول شوې ده.
طالبانو په وار وار د کابل ښار څخه ښځې او نجونې د حجاب د نه مراعت کولو په تور نیولې دي.
دغې ډلې د روان کال د زمري میاشتې په لومړیو کې هم لسګونه ښځې او نجونې د کابل ښار له بېلا بېلو سیمو په ځانګړې توګه د کابل له لوېدیځ څخه نیولې او له ځان سره یې وړې دي
