د کابل لوېدیځ محمد علي جناح روغتون کې سرچینې وايي، د دې روغتون د ارتوپیدي څانګې توکي او روغتیايي کارکوونکي، له لوېدیځ نه ختیځ ته لېږدول شوي دي.
رخشانه: د کابل لوېدیځ ته د محمد علي جناح روغتون کې یوې سرچینې رخشانې رسنۍ ته و ویل، دغه پرېکړه د طالبانو د عامې روغتیا وزارت له خوا شوې ده.
د رخشانې رسنۍ سرچینې زیاته کړه، د طالبانو د دې پرېکړې له مخې، د یاد روغتون د ارتوپیدي څانګه چې مراجعین یې کم، خو ځای یې زیات نیولی وو، له محمد علي جناح روغتون څخه بل ځای ته لېږدول شوې ده.
د هغه په وینا، د محمدعلي جناح روغتون د توکو او روغتیايي کارکوونکو تر لېږد وروسته، د هغې خونې د جراحۍ څانګې ته سپارل شوې دي.
د رخشانې رسنۍ سرچینې مشخصه نه کړه، چې د طالبانو د پرېکړې پر اساس د محمد علي جناب روغتون په کومه کچه روغتیايي کارکوونکي د ارزان قیمت سیمې ته لېږدول شوي دي.
په ورته وخت د طالبانو د عامې روغتیا وزارت چارواکي وايي، د محمدعلي جناح روغتون توکي، د خدماتو د کمزورتیا، ځای د کمښت او روغتیايي معیارونو د نه وړاندې کولو له امله د کابل له لوېدیځ نه ختیځ ته لېږدول شوي دي.
د طالبانو د عامې روغتیا وزارت ویاند شرافت زمان امرخېل نن (یکشنبې د وږي ۲۳ مه) د یوې خبرپاڼې په خپرولو سره ویلي، خلکو د محمد علي جناح روغتون د خدماتو وړاندې کولو څخه شکایت درلود او دغه وزارت د یادې ستونزې د حل په موخه د هغې د توکو په لېږد لاس پورې کړی دی.
هغه پر دوام لیکلي، په تېره یوه لسیزه کې د کابل د ختیځ ارزان قمیت سیمې خلکو ته هېڅ ډول پاملرنه نه ده شوې او هغوی هېڅ تخصصي روغتون نه لري.
په اعلامیه کې راغلي، ارزن قمیت سیمې ته د دې روغتون د لېږد یو لامل د کابل – جلال آباد لویې لارې ته د هغې نېږدې والی دی، چې کابو هره ورځ هېوادوال د «ترافیکي پېښو او تروما» له امله ژوند له لاسه ورکوي او اړتیا ده، چې په دې سیمه کې یو تخصصي روغتون شتون ولري.
د اعلامیې پر بنسټ، د طالبانو له لوري د محمد علي جناح روغتون ۲۵۰ تنه روغتیايي کارکوونکي، د کابل ختیځ کې یوې شپږ پوړیزه ودانۍ ته لېږدول شوي، تر څو د دې سیمې خلکو ته خدمات وړاندې کړي.
د طالبانو د عامې روغتیا وزارت ویاند پر دوام وايي، دا مهال د محمد علي جناح روغتون ۷۵۰ تنه روغتیايي کارکوونکي د کابل د لوېدیځ خلکو ته خدمات وړاندې کوي او مراجیعن د پخوا په شان دوام لري.
هغه ټينګار کړی، چې د کابل لوېدیځ کې دوه، د حضرت بلال ۵۰ بستریز او د برچي ۱۰۰ بستریز روغتونونه د سیمې اوسېدونکو ته خدمات وړاندې کوي.
د طالبانو د عامې روغتیا وزارت معلومه کړې نه ده، چې د محمد علي جناح روغتون د کومې برخې توکي او روغتیايي کارکوونکي د کابل له لوېدیځه و ختیځ ته لېږدولي دي.
