په جلا وطنۍ کې د افغان ښځو اعتراضي غورځنګ اعلان کړی، چې د طالبانو تر واک لاندې افغانستان کې دیموکراسي په بشپړه توګه له منځه تللې ده.
رخشانه: د دې اعتراضي غورځنګ غړو نن (دوشنبې د وږي ۲۴ مه) د دیموکراسۍ له نړیوالې ورځې سره هم مهاله ویلي، دیموکراسي له بنسټیزو ارزښتونو چې پر خپلواکۍ، برابرۍ، سیاسي او ټولنیز برخلیک په ټاکلو کې د نړیوال ګډون پر بنسټ ولاړ دي یادونه ده.
په جلا وطنۍ کې د افغان ښځو د دې اعتراضي غورځنګ غړو ویلي، په افغانستان کې دیموکراسي او د یوې خپلواکې ټولنې ارزښتونو په بشپړه توګه له منځه وړل شوي دي.
هغوی د ښځو او نجونو پر حقونو او اساسي خپلواکیو د طالبانو محدویتونو ته په اشارې زیاته کړې، چې هغوی نه یوازې د زده کړوو کار او ټولنیز ګډون له حق څخه محرومې کړای شوې، بلکې عملآ د تابعیت له هویت څخه لرې کړای شوې دي.
اعلامیه کې راوړل شوي:«افغانستان د خپل یو له تر ټولو تور تاریخ څپرکیو کې په یوه داسې هېواد بدل شوی، چې په هغه کې «دیموکراسي په بشپړه توګه رد شوې ده.»
معترضو مېرمنو ویلي، د ښځو حذفول یوازې د افغانستان تر پولو نه دي ایسار، بلکې سلګونه زره افغان ښځې او نجونې، چې ګاونډیو هېوادونو ته یې پناه وړې هم په زور او جبر سره ایستلو او همدغه جغرافیې ته پر ګرځولو سره مخ دي، چې په هغه کې دوی ته هېڅ ډول حق شتون نه لري.
هغوی په پاکستان او ایران کې د افغان کډوالو وضعیت ته په اشارې وايي، چې هغوی «نه امنیت لري، نه زده کړو او درملنې ته بسندویه لاسرسی او نه هم د مېشتېدو لپاره کوم تضمین.»
معترضو ښځو په ایران او پاکستان کې پر افغان کډوالو محدویتونه د بشري حقونو څخه ښکاره سرغړاوی او د دیموکراسۍ او د کډوالو د نړیوالو کنوانسیونونو له ارزښتونو سره په ټکر کې وبلل.
په جلا وطنۍ کې د افغان ښځو اعتراضي غورځنګ ټينګار کړی، دیموکراسي هغه وخت مانا لري، چې هېڅ انسان په ځانګړې توګه ښځې له خپلو اساسي حقونو محرومې نه شي.
هغوی له نړیوالې ټولنې غوښتي، چې د افغان کډوالو د جبري ایستلو مخنیوی وکړي او د هغوی لپاره د ملاتړ او خوندي ځایونو شرایط برابر کاندي.
دغه راز معترضو مېرمنو دا هم ویلي، د ښځو لپاره برابر حقونو او د پرېکړې کولو په ټولو کچو کې د ګډون له تضمین پرته به، د افغانستان د راتلونکې لپاره هېڅ سیاسی حل مشروع نه وي
