د افغانستان لپاره د ملګرو ملتونو د سرمنشي ځانګړې استازې او د یوناما مشرې رزا اوتنبایوا وايي، د ملګرو ملتونو پر ښځینه کارکوونکو د طالبانو تازه محدویتونو د مرستو رسولو بهیر له خنډ سره مخ کړی دی.
رخشانه: یوناما نن (دوشنبې د وږي ۲۴ مه) پر خپله اېکس پاڼه د یوه پوسټ په خپرولو سره لیکلي، اوتنبایوا د کونړ له زلزله ځپلو سیمو لیدنه وکړه.
د افغانستان لپاره د ملګرو ملتونو د سرمنشي ځانګړې استازې د کونړ له زلزله ځپلو سیمو د لیدنې پر مهال ویلي، دغې طبیعي پېښې کابو نیم میلیون کسان بېړنیو مرستو ته اړ کړي دي.
اوتنبایوا زلزله ځپلو کسانو ته د ژمي له رارسېدو وړاندې، د بېړنیو بشري مرستو پر رسولو ټینګار کړی دی.
هغې ټينګار کړی، چې ملګرو ملتونو د بېړنیو مرستو چمتو کولو په موخه، د ۱۳۹ میلیون ډالرو غوښتنه کړې او د دې کچې پیسو له چمتوالي پرته به، سلګونه زره کورنۍ له خوراکي توکو او سرپناه پرته یخ ژمي سره مخ شي.
د یوناما مشرې په ملګرو ملتونو پورې تړلو بنسټونو کې د ښځو پر کار ممنوعیت ته په اشارې وايي، د ملګرو ملتونو د کډوالو چارو عالي کمېشنرۍ (UNHCR) د دغه محدویتونو له امله، له ګاونډیو هېوادونو راستنېدونکو افغان کډوالو ته د نغدو پیسو د وېش لړۍ په لنډمهالې توګه درولې ده.
هغې ویلي، د کډوالو په چارو کې د ملګرو ملتونو عالي کمېشنرۍ، د ښځینه کارکوونکو پرته نه شي کولی، شاوخوا ۵۲ سلنه راستنېدونکي کډوال ثبت کړي.
د افغانستان لپاره د ملګرو ملتونو د سرمنشي ځانګړې استازې ټينګار کړی، چې اړمنو کسانو، په ځانګړې توګه هغو ښځو او ماشومانو ته چې زلزله کې ځپل شوي، د مرستو رسولو برخه کې د ښځینه وو له شتون څخه انکار د نه منلو دی.
اوتنبایوا ویلي:«افغان ښځې یوازې ګټه اخیستونکې نه دي، هغوی د مرسته کولو عملیاتو لپاره د ملا تیر دي او د هغوی له شتون پرته په لازمه کچه مرستې رسول امکان نه لري.»
هغې نړیواله ټولنه بېړني اقدام کولو ته رابللې او خبرداری یې ورکړی، چې ډېری کورنۍ به په ساړه ژمي کې له سخت ناورین سره مخ شي.
