فاریاب کې سیمه ییزې سرچینې وايي، د دې ولایت په خواجه سبزپوش ولسوالۍ کې یوه ځوانه ښځه د خپل ورور له خوا وژل شوې ده.
رخشانه: فاریاب کې لږ تر لږه دریو سیمه ییزه سرچینو د هویت پټ ساتلو سره رخشانې رسنۍ ته منلې، چې دغه پېښه (شنبې د وږي ۲۲ مه) د دې ولایت د خواجه سبزپوش ولسوالۍ په «پخل تاغک» کلي کې رامنځ ته شوې ده.
د سرچینو په وینا، دغه ښځه د خپلې کورنۍ سرپرسته وه او خاوند یې څه موده مخکې مړ شوی و او له هغې یو ماشوم هلک پاتې شوی دی.
سرچینې زیاتوي، د دغې ښخې کورنۍ غوښتل هغه په زور یوه بل سړي ته په نکاح ورکړي، خو هغې د کورنۍ له دې پرېکړې سره مخالفت وکړ او اجباري واده ته یې غاړه کېنښوده.
د سرچینې په وینا، دغه ځوانه ښځه د خپلې کورنۍ د غړو د سترګو پر وړاندې، د ورور له خوا په ډزو ویشتل شوې ده.
تر اوسه فاریاب کې ځايي طالب چارواکو په دې اړه څه نه دي ویلي.
د هېواد په شمال کې فاریاب یو له هغه ولایتونو دی، چې د طالبانو بیا واک ته تر رسېدو وروسته د وژنو، ځان وژنو او ښځو پر وړاندې د پراخ تاوتریخوالي شاهد وو.
په زور او کم عمر کې ودونه، د ټاکنې له حق څخه د ښځو محرومیت، ټولنیز سخت فشارونه، کورنی تاوتریخوالی او بېوزلي، د دې ډول پېښو رامنځ ته کېدو اصلي لاملونو ګڼل کېږي.
