سرپل کې سیمه ییزو سرچینو ادعا کړې، چې د دې ولایت امنیه قوماندان او د امربالمعروف رییس یوه نجلۍ په زور د خپلې ډلې یوه غړي ته نکاح کړې او هلمند ته یې بیايي.
رخشانه: سرپل کې یوې سرچینې رخشانې رسنۍ ته په دوه لېږل شویو ویډیوګانو کې ویلي، دغه ځوانه نجلۍ نن (سه شنبې د وږي ۲۵ مه) له دې ولایت څخه هلمند ته بېول کېږي.
د سرچینې په وینا، دغه نجلۍ کال وړاندې په زور د طالبانو یوه غړي ته نکاح شوې وه.
سرچینه وايي، دغه نجلۍ د سرپل اصلي اوسېدونکې ده، ۱۸ کاله عمر لري، په قوم ازبکه ده خو خاوند یې د هلمند ولایت اوسېدونکی او په قوم پښتون دی.
د رخشانې رسنۍ سرچینه زیاتوي، دغې جوړې له یوه کال راپدېخوا په سرپل ولایت کې ژوند کاوه، خو اوس یې خاوند غواړي، هغه او ماشوم زوی یې هلمند ته ولېږدوي.
دغې ځوانې ښځې هلمند ولایت ته له تګ سره مخالفت کړی او په همدې دلیل د سرپل د امنیه قوماندان او د امربالمعروف د رییس عبدالبصیر مظهري او خپل خاوند له خوا نیول شوې او زندان ته اچول شوې ده.
په یوه ویډیو کې چې رخشانې رسنۍ تر لاسه کړې، یوه ښځه د زندان د ننه په یوه کوټه کې چې دا او زوی یې په کې ساتل کېږي ځان ښيي او وايي دوه شپې ورځې کېږي، چې په دغه ځای کې زنداني شوې ده.
هغه په دې ویډیو کې وايي، په وار وار د خاوند له خوا وهل شوې ډبول شوې او د طالبانو د امنیت رییس، د دې خاوند ته لارښونه کړې، چې خپله ښځه و وهي او په زور یې هلمند ته ولېږدوي.
دا په دې ویډیويي کلپ کې وايي:«د سرپل د ملي امنیت رییس زما خاوند ته زنګ وهي، چې ښځه دې وډبوه، درمل ورکړه، ویې وژنه، موټر ته یې واچوه او له زوی سره یې یو ځای هلمند ته ولېږدوه، خو زه هلمند ته نه ځم.»
دغه ځوانه ښځه زیاتوي، چې هېڅوک یې خبرو ته غوږ نږدي او پاملرنه ورته نه کوي.
په یوه بله ویډیو کې چې رخشانې رسنۍ تر لاسه کړې، یوه ښځه له اوښکو په ډکو سترګو وايي، لور یې د «امربالمعروف د رییس او امنیت د رییس» په امر هلمند ته بېول کېږي.
هغه په دې ویډیو کې د لېږد ځای او د خپلې لور د لېږدولو د څرنګوالي په اړه په څرګنده څه نه وايي.
د دغه ویډیو د کره ثبت او ځای په اړه معلومات نشته.
هغې سرچینې چې دا ویډیوګانې یې لېږلې ادعا کوي، چې دغه نجلۍ او د کورنۍ هېڅ غړی یې دې نکاح ته راضي نه وو او اوس هم هلمند ته د هغې له بېولو سره مخالف دي.
سرچینې زیاته کړې، په سرپل کې د طالبانو امنیه قوماندان او د امربالمعروف رییس «د طالبانو یوه غړي ته اجازه او امر ورکړی وو، چې دغه نجلۍ په زور واده کړي او ویې لږدوي.»
رخشانه رسنۍ په خپلواکه توګه د دغې پېښې پخلی نه شي کولی.
