افغانستان کې د ملګرو ملتونو د ماشومانو د ملاتړ صندوق (یونیسف) اعلان کړی، چې د افغانستان ختیځ کې د مرګونې زلزلې تر نیمايي زیات قربانیان ماشومان دي.
رخشانه: دغه بنسټ نن (سه شنبه د وږي ۲۵ مه) پر خپله اېکس پاڼه د یوه پوسټ په خپرولو سره لیکلي، د قربانیانو تر منځ داسې ماشومان شته چې یوازې تر کنډوالو لاندې پاتې شوي دي.
یونیسف پر دوام لیکلي، د دغه طبیعي پېښې په پایله کې تر نیم میلیون زیات کسان اغېزمن شوي او زرګونه د استوګنې کورونو زیان لیدلی یا ویجاړ شوي دي.
دغه بنسټ زیاته کړې، چې د دې طبیعي پېښې په پایله کې کورنۍ د سترګو په رپ کې سره وپاشل شوې.
د یونیسف په وینا، په طبیعي پېښو کې تر ډېره ماشومان کړاونه زغمي.
د ملګرو ملتونو د ماشومانو د ملاتړ صندوق وايي، د افغانستان ختیځ کې زلزله ځپلي ماشومان بېړنیو مرستو ته اړتیا لري.
دغه بنسټ ټينګار کړی، چې له خپلو شریکانو سره په سیمه کې شتون لري او د ماشومانو او کورنیو په دې ملاتړ سره ځواب وايي.
یونسف د راتلونکو شپږو میاشتو لپاره د ۲۲ میلیون ډالرو غوښتنه کړې، تر څو د ۲۱۲ زره ماشومانو په ګډون ۴۰۰ زره تنه تر بشري مرستو لاندې راولي.
د ماشومانو د ساتنې بنسټ څه موده وړاندې په یوه راپور کې ویلي وو، د هېواد ختیځ کې د زلزلې له امله ۲۶۰ زره ماشومان اغېزمن شوي، چې بېړنیو مرستو ته اړتیا لري.
