د افغانستان د عدالت غوښتونکو ښځو اعتراضي غورځنګ وايي، چوپتیا او د طالبانو سره تعامل د افغان ښځو او بشري حقونو له اصولو سره ښکاره خیانت دی.
رخشانه: د دې اعتراضي غورځنګ غړو نن (پنشنبې د وږي ۲۷ مه) په یوه پرېکړه لیک کې لیکلي، پر واټونو د ښځو د اعتراضونو په مخنیوي سره دوی په کورونو کې اعتراضي غونډې کوي تر څو«د عدالت غوښتنې چیغې او مقاومت نه غلی پاتې نه شي.»
د افغانستان د عدالت غوښتونکو ښځو د اعتراضي غورځنګ په پرېکړه لیک کې راغلي، دوی اعتراض د طالبانو د سیستماتیک ظلم پر وړاندې د ښځو د مبارزې یوه برخه بولي.
د دې اعتراضي غورځنګ غړو ویلي، طالبانو غیر انساني قوانینو په تپلو، له ټولنیز ژوند، زده کړو او اقتصاد څخه د ښځو په لرې کولو سره د ښکاره جنایت او جنسیتي توپیر پر بنسټ ولاړ نظام مرتکب شوي دي.
هغوی طالبان«د ښځو او بشریت پر وړاندې جنایت کوونکي» بللي او نړیوالۍ ټولنې ته په خطاب کې وايي، د طالبانو پر وړاندې چوپتیا او ورسره تعامل، له افغان مېرمنو او بشري حقونو له اصولو سره د ښکاره خیانت په څېر دی.
معترضو مېرمنو ویلي، د طالبانو هر ډول په رسمیت پېژندل او یا ورسره همکاري، د جنسیتي توپیر سره یو لاسي او د دغې ډلې جنایاتو ته د مشروعیت ورکول دي.
هغوی له نړیوالې ټولنې غوښتي، چې د طالبانو جنسیتي توپير په رسمیت وپېژني او هغه د بشریت پر وړاندې د جنایت په توګه محکوم کړي.
معترضو مېرمنو دغه راز له نړیوالې ټولنې غوښتي، چې له طالبانو سره هر ډول سیاسي او دیپلوماتیک تعامل باید ودرول شي.
هغوی د افغان مېرمنو د بېړني او تل پاتې ملاتړ غوښتنه کړې وايي، له افغان ښځو ملاتړ باید د نړیوالو بنسټونو او دولتونو کړنلاره ورګرځول شي.
د عدالت غوښتونکو ښځو د غورځنګ غړو له ښځو غوښتي، چې د طالبانو له ګواښونو او محدویتونو سره سره، اعتراضي غونډې وکړي او له مقاومت څخه لاس په سر نه شي.
